Lajmet e fundit
Një analist i ushtrisë amerikane është deklaruar fajtor për akuzat për komplot për shitjen e sekreteve ushtarake Kinës, ka thënë Departamenti i Drejtësisë (DOJ).
Korbein Schultz u arrestua në mars pas një hetimi nga FBI dhe kundërzbulimi i Ushtrisë Amerikane që pretendoi se ai ishte paguar 42 mijë dollarë në këmbim të dhjetëra të dhënave të ndjeshme të sigurisë.
Komploti kriminal filloi në qershor 2022 dhe vazhdoi deri në arrestimin e tij, thanë zyrtarët.
Ai është planifikuar të dënohet në janar, raporton BBC, transmeton Klankosova.tv.
Schultz, i cili mbante një leje sigurie për të hyrë në informacione tepër sekrete, komplotoi për të mbledhur të dhëna me dikë për të cilin ai besonte se jetonte në Hong Kong, sipas dokumenteve të gjykatës.
Banori i supozuar i Hong Kongut i kërkoi Schultz të mblidhte të dhëna të ndjeshme në lidhje me mbrojtjen raketore dhe sistemet e artilerisë mobile, sipas të dhënave të gjykatës.
Sgt Schultz gjithashtu mblodhi të dhëna për avionët luftarakë amerikanë, taktikat ushtarake dhe strategjinë e mbrojtjes së ushtrisë amerikane për Tajvanin, bazuar në atë që mësoi nga lufta e Rusisë në Ukrainë.
"Duke komplotuar për t'i transmetuar informacione të mbrojtjes kombëtare një personi që jeton jashtë Shteteve të Bashkuara, ky i pandehur e vuri në mënyrë të pakujdesshme sigurinë tonë kombëtare në rrezik për të fituar para nga besimi që ushtria jonë i dha atij”, tha Ndihmës Prokurori i Përgjithshëm Mattheë Olsen i Divizionit të Sigurisë Kombëtare të DOJ-së
Schultz të martën u deklarua fajtor për të gjitha akuzat kundër tij, duke përfshirë komplotin për të marrë dhe zbuluar informacionin e mbrojtjes kombëtare dhe ryshfetin e një zyrtari publik, transmeton Klankosova.tv.
FBI dhe Komanda e Kundërzbulimit të Ushtrisë Amerikane po vazhdojnë hetimet për rastin.
