Unitedi me rikthim mposht Aston Villan – Hojlund shënon golin e parë në ligë

Skuadra e Eric Ten Hag ka bërë një rikthim senzacional ndaj kundërshtarit në superformë, Aston Villa. Ishin mysafirët që udhëhoqën të parët në ndeshje, me golat e McGinn dhe Dendoncker duke udhëhequr bindshëm 2 me 0 në “Teatrin e Ëndrrave” në pjesën e parë. Por, pjesa e dytë e ndeshjes solli ndryshim në rezultat, pasi “Djajtë e kuq” bënë një rikthim të madh në lojë. Garnacho ishte lojtari i mbrëmjes, duke shënuar dy herë në ndeshje për të barazuar rezultatin. Ndërsa Hojlund shënoi për 3-2 duke ia siguruar një fitore tejet të rëndësishme ekipit të tij. Vlen të theksohet se ky gol ishte edhe i pari për Hojlund në Premier Ligë. Me këtë fitore, Unitedi kalon në vendin e gjashtë në tabelë me 31 pikë nga 19 ndeshje, kurse Aston Villa mbetet në të tretin me 39 pikë - 3 më pak se Liverpooli që mban kreun. /Klankosova.tv