Ukraina akuzon Rusinë për minimin e raundit të ardhshëm të bisedimeve të paqes

Presidenti i Ukrainës ka vënë në pikëpyetje angazhimin e Rusisë për të çuar përpara bisedimet e paqes, pasi Moska konfirmoi se do të dërgonte një ekip për bisedime në Stamboll të hënën. Rusia ende nuk i ka dërguar propozimet e saj negociuese Ukrainës - një kërkesë kyçe nga Kievi. Zëdhënësi i Kremlinit, Dmitry Peskov, tha se kushtet e Moskës për një armëpushim do të diskutoheshin në Turqi. Por Volodymyr Zelensky akuzoi Moskën se "po bën gjithçka që mundet për të siguruar që takimi i ardhshëm i mundshëm të jetë i pafrytshëm". "Që një takim të jetë kuptimplotë, agjenda e tij duhet të jetë e qartë dhe negociatat duhet të përgatiten siç duhet", tha ai. Ukraina i kishte dërguar propozimet e saj Rusisë, duke riafirmuar "gatishmërinë për një armëpushim të plotë dhe pa kushte". Raundi i parë i bisedimeve dy javë më parë në Stamboll nuk solli ndonjë përparim, por arriti një shkëmbim të robërve të luftës. Presidenti rus Vladimir Putin nisi një pushtim në shkallë të plotë të Ukrainës në shkurt të vitit 2022. Rusia aktualisht kontrollon rreth 20% të territorit të Ukrainës, përfshirë gadishullin jugor të Krimesë që Moska e aneksoi në vitin 2014, shkruan BBC, transmeton Klankosova.tv.