“Udhëtimi i gjatë drejt natës” përfaqëson Shqipërinë në Rumani

Drama “Udhëtimi i gjatë drejt natës” premierë në sezonin artistik të vitit 2014 në Teatrin Kombëtar do të prezantohet në një prej festivaleve më të rëndësishme të teatrit në botë.

Festivali Ndërkombëtar i Teatrit “Neta” në Bukuresht, Rumani, mes trupave pjesëmarrëse teatrore të suksesshme nga shtete të ndryshme të botës do të mirëpresë dhe veprën e autorit të njohur Eugene O’Neill, me regji nga Spiro Duni dhe interpretim të aktorëve të njohur të teatrit në vend.

Drama e nobelistit amerikan si dhe njërit prej shkrimtarëve më të mëdhenj të të gjitha kohërave Eugene O’Neill, interpretohet nga një kastë e njohur aktorësh: Yllka Mujo, Artan Imami, Lulzim Zeqja, Genti Deçka dhe Flutura Kureta. Pas sukseseve që vepra teatrore pati në skenën e teatrit në Tiranë, në Teatrin Kombëtar këto kohë ka marrë vëmendje puna që duhet për tu përfaqësuar në skenën e festivalit, që do të zhvillohet në Bukuresht, Rumani.

Motoja e këtij festivali këtë vit vjen “Teatri, heroi i kohërave tona”, ku për publikun në muajin gusht kur pritet të zhvillohet festivali do të jenë në skenë 13 produksione teatrore nga dhjetë shtete anëtare të “Neta”-s.