U gjet i vdekur në banesë, ekspertiza mjeko-ligjore: 81-vjeçari u vra

Ekspertiza mjeko-ligjore e 81-vjeçarit Xhemal Meta, i cili u gjet pa shenja jete në banesën e tij në fshatin “Shëngjin i Vogël”, ka zbuluar se ai është vrarë. Ngjarja fillimisht u raportua si aksidentale, por pas hetimeve të kryera, u konstatua se i moshuari kishte marrë goditje fatale nga pas kokes, që shkaktuan vdekjen e tij. Burime bëjnë me dije se Xhemal Meta kishte vendosur të jetonte i vetëm në këtë fshat pranë Tiranës, ndërkohë që familja e tij jetonte në kryeqytet. Policia e Tiranës ka referuar materialet përkatëse në Prokurori, duke i referuar ngjarjen si “Vrasje me dashje”, ndërkohë që hetimet vijojnë. Nga hetimet paraprake dhe ekzaminimi mjeko-ligjor, ka rezultuar se shtetasi Xh.M. ka pësuar dëmtime në pjesën e pasme të kokës, të dyshuara të shkaktuara nga goditje me sende të forta. DVP Tiranë ka referuar materialet në Prokurori për veprën penale “Vrasje me dashje”, e parashikuar nga neni 76 i Kodit Penal. Hetimet vijojnë nën drejtimin e Prokurorisë, për të dokumentuar plotësisht ngjarjen dhe për të përcaktuar rrethanat konkrete të ngjarjes, si dhe shkaqet që çuan në humbjen e jetës së shtetasit Xh.M.”, njofton policia e Tiranës./Euronews.al/.