Trusti nesër sërish në Kuvend – iniciatorët shprehen optimistë se do të kalojë

Të enjten, më 19 janar në seancën e Kuvendit të Kosovës do të hidhet në votim projektligji për tërheqjen e 30 për qind të Fondit të Kursimeve Pensionale të Kosovës. I njohur si Trusti, nesër për herë të dytë do të futet në votim, pasi në herën e parë dështoi. Këtë herë, projektligji do të paraqitet si peticion i mbi 21 mijë qytetarëve, të cilët nënshkruan në favor të tërheqjes së kursimeve nga fondi pensional, shkruan Klankosova.tv. Bashkëiniciatori i peticionit për tërheqjen e mjeteve nga Trusti, Adnan Jashari shprehet optimist se deputetët do të reflektojnë mbi gjendjen e qytetarëve dhe nuk do të zhgënjejnë ata. “Duam të besojmë se deputetët do të reflektojnë mbi gjendjen dhe kërkesën e qytetarëve nesër. Në rast se nuk votohet edhe nesër, do të ketë zhgënjim dhe revoltim të qytetarëve, sepse atyre iu ka humbur durimi nga gjendja e rëndë ekonomike dhe shumica janë thelluar në borxhe”, deklaron Jashari për Klankosova.tv. Mirëpo, partia në pushtet, Lëvizja Vetëvendosje si herën e parë, ashtu edhe për ditën e nesërme ka deklaruar se do ta kundërshtojë këtë projektligj. Këtë qëndrim e ka konfirmuar edhe kryetarja e GP të VV-së, Mimoza Kusari – Lila ditë më parë në media. “Qëndrimi i Grupit Parlamentar të Lëvizjes Vetëvendosje është i qartë, nuk e kemi mbështetur tërheqjen e 30%-shit të Fondit të Kursimeve Pensionale, konsiderojmë se në aspektin ekonomik mund të ketë një ndjesi të zgjidhjes në aspektin afatshkurtër megjithatë në të njëjtën periudhë kohore do të ketë ndikim afatmesëm dhe afatgjatë negativ edhe në mirëqenien e qytetarëve edhe në parametra të tjerë ekonomikë, përfshirë edhe ngritjen e çmimeve, sasinë e cash-it në qarkullim dhe humbjen e sigurisë për të ardhmen për të gjithë ata që i tërheqin Fondin e Kursimeve Pensionale kur të arrijnë moshën e pensionimit”, deklaroi Kusari-Lila. Megjithatë Jeton Demi, zëdhënës i Fondit të Kursimeve Pensionale të Kosovës – Trustit, thotë për Klankosova.tv se me kalimin e projektligjit që nënkupton tërheqjen e kursimeve pensionale, dëmtohet vetëm fondi vetjak pensional i qytetarëve. Demi theksoi gjithashtu se ende nuk është bërë rimbursimi i borxhit prej rreth 200 milionë euro nga qeveria nga tërheqja e 10 përqindëshit, e cila u mundësua nga Pakoja e Rimëkëmbjes Ekonomike shkaku i pandemisë së Covid-19 në vitin 2020. Sipas tij, rimbursimi pritet të bëhet në muajin qershor. Por, gjatë ditës së sotme, Kryetari i Sindikatës së Pavarur të Sektorit Privat, Jusuf Azemi përmes një letre iu është drejtuar deputetëve të Kuvendit të Kosovës që të votojnë ndarjen e 30 % të mjeteve nga Trusti. Ai këtë thirrje ia atribuon gjendjes së rëndë ekonomike dhe pagave të ulëta. “Ju bëj apel pozitë e opozitë që ta votoni ligjin për ndarjen e 30 % të Trustit, së paku njëherë pas dy vitesh bëhuni të sinqertë me punëtorët e sektorit privat të Kosovës dhe votoni këtë ligj”, tha Azemi në letrën e tij. Herën e parë që u propozua tërheqja e 30 përqind të kursimeve pensionale në Kuvend ishte në qershor të vitit 2022 me iniciativë të deputetit të PDK-së, Bekim Haxhiu. Ky projektligj nuk kaloi, sepse e votuan pro vetëm 44 deputetë, 57 tjerë e kundërshtuan dhe me një abstenim. Kësaj radhe, votë pro pritet të ketë edhe nga deputetja boshnjake e Kosovës, Duda Balje, e cila ka deklaruar publikisht se do ta mbështesë këtë projektligj. /Klankosova.tv