Trumpi njofton se do nënshkruajë urdhër ekzekutiv që synon të ulë çmimet e barnave

Presidenti amerikan, Donald Trump njoftoi të dielën se ai planifikon të ringjallë një politikë të diskutueshme që nga mandati i tij i parë që synon të ulë kostot e barnave duke bazuar pagesat për disa ilaçe në çmimet e tyre në vende të tjera. Rregulli i tij i mëparshëm, i quajtur "Kombi më i favorizuar", u finalizua në fund të vitit 2020, por u bllokua nga gjykatat federale dhe u anulua nga presidenti i atëhershëm Joe Biden në vitin 2021. Rregulli do të kishte aplikuar për pagesat e "Medicare" për barna të caktuara të administruara në zyrat e mjekëve. Megjithatë, është e paqartë për cilat pagesa apo barna do të zbatohej direktiva e re. Në një postim në “Truth Social” të dielën në mbrëmje, Trump tha se planifikon të nënshkruajë një urdhër ekzekutiv të hënën në mëngjes që ai argumenton se do të ulte në mënyrë drastike çmimet e barnave.