Tri raste të dhunës në familje në Gjakovë

Policia e Kosovës,  ka regjistruar tri raste të dhunës në familje në komunën e Gjakovës, ku të dyshuarit janë arrestuar për ushtrim të dhunës fizike dhe psikike ndaj anëtarëve të familjes. Në një nga rastet, më 13 prill rreth orës 11:00, një burrë  u arrestua nën dyshimin se ka ushtruar dhunë fizike dhe psikike ndaj dy viktimave, një burri dhe një gruaje. Të dy viktimat kanë pranuar tretman mjekësor, ndërsa i dyshuari është dërguar në mbajtje me vendim të prokurorit. Një rast tjetër është raportuar më 11 prill në orën 21:00, por arrestimi i të dyshuarit ndodhi më 13 prill, njofton Klankosova.tv. I dyshuari akuzohet se ka sulmuar fizikisht një burrë dhe ka fyer një grua. Edhe në këtë rast, viktima ka marrë trajtim mjekësor, ndërsa i dyshuari është dërguar në mbajtje. Ndërkohë, më 13 prill rreth orës 12:00, një tjetër burrë u arrestua pasi dyshohet se ka ushtruar dhunë psikike ndaj një gruaje. Pas intervistimit, ai është liruar në procedurë të rregullt me vendim të prokurorit./Klankosova.tv.