Tre vjet nga marrja e pushtetit, afganët mbesin të bllokuar në Shqipëri

Janë bërë tri vjet prej kur talebanët morën pushtetin në Afganistan. Nga ajo kohë mijëra qytetarë të cilët e kanë ndjerë vetën të rrezikuar, u larguan nga shtëpitë e tyre dhe u vendosën në vende më të sigurta. Një numër prej tyre nga ajo kohë jetën e tyre po e zhvillojnë në Shqipëri. Radio Evropa e Lirë, sjell historinë e Fatimas, emri i së cilës është ndryshuar për ta mbrojtur identitetin, dhe djalit të saj shtatëvjeçar. Ajo kishte qenë deputete dhe mund të ishte cak i hakmarrjes, transmeton Klankosova.tv Ish-deputetja afgane është në pritje të zhvendosjes nga Shtetet e Bashkuara të Amerikës. “Paqartësia është torturuese”, tha nëna vetushqyese. "E ardhmja jonë është pezull", theksoi ajo. Fatima ishte në mesin e qindra mijëra afganëve të rrezikuar që u larguan nga atdheu i tyre pas rënies së Qeverisë afgane që mbështetej nga Perëndimi dhe rimarrjes së pushtetit nga talibanët. Shtetet e Bashkuara dhe aleatët e tyre nxorën me avionë dhjetëra mijëra afganë jashtë vendit gjatë evakuimit kaotik dhe vdekjeprurës nga Kabuli. Fatima ishte në mesin e atyre që iku rrugës për në Pakistanin fqinj. Prej aty, disa mijëra afganë u zhvendosën përkohësisht në Shqipëri, ndërsa prisnin që të përpunoheshin vizat e tyre amerikane. Por, tre vjet pas rimarrjes së pushtetit nga talibanët, dhjetëra afganë mbeten të bllokuar në vendin e vogël ballkanik.