Tre të vrarë dhe tre të plagosur nga të shtënat në Virxhinia

Tre persona u vranë dhe tre të tjerë u plagosën nga të shtënat që ndodhën të martën në mbrëmje në Virxhinia, SHBA. Autoritetet njoftuan se një ose më shumë nga sulmuesit janë ende në arrati. Incidenti ndodhi rreth orës 17:30 në një kompleks shtëpish në qarkun Spotsylvania, i cili ndodhet pak jashtë Fredericksburgut, rreth 105 kilometra në jugperëndim të Washingtonit, transmeton klankosova.tv. Majorja Elizabeth Scott, zëdhënëse e zyrës së sherifit të Spotsylvania, tha se policia ka nisur hetimet dhe ka kërkuar nga qytetarët të shmangin zonën dhe të qëndrojnë brenda ndërtesave të tyre deri në përfundimin e operacioneve. Hetuesit besojnë se të shtënat mund të jenë kryer nga më shumë se një person. Asnjë arrestim nuk është bërë deri tani dhe autoritetet nuk kanë ofruar ndonjë informacion mbi motivin e mundshëm të sulmit. "Ka dhjetëra oficerë që po kërkojnë aktivisht të dyshuarit dhe po sigurojnë skenën e krimit", tha Scott. Tre personat e plagosur janë dërguar në spital me plagë të shkaktuara nga arma e zjarrit, por informacioni mbi gjendjen e tyre nuk është bërë i disponueshëm Si pasojë e incidentit, shkollat publike të qytetit Fredericksburg njoftuan se do të fillonin dy orë vonë më 9 prill, për shkak të ndikimit të ngjarjes mbi komunitetin shkollor.