Trazira në rritje, Los Angeles nën shtetrrethim për natën e dytë

Los Angeles është në shtetrrethim për natën e dytë pas gati një javë trazirash në qytet për bastisjet e emigracionit në SHBA. Shumë njerëz u arrestuan për shkeljen e shtetrrethimit në qendër të qytetit menjëherë pasi ai hyri në fuqi në orën 20:00. Gati 400 persona janë arrestuar në Los Angeles që nga fillimi i protestave të premten, duke përfshirë 330 emigrantë pa dokumente dhe 157 persona të arrestuar për sulm dhe pengim, duke përfshirë një për tentativën për vrasje të një oficeri policie, transmeton Klankosova.tv. Prokurorët federalë kanë akuzuar deri tani dy burra për hedhjen e koktejve molotov ndaj oficerëve të policisë në dy incidente të veçanta. Gjithsej katër mijë trupa të Gardës Kombëtare dhe 700 marinsë janë vendosur për të ndihmuar në shuarjen e trazirave. Disa nga ato trupa të Gardës Kombëtare tani janë të autorizuara të ndalojnë njerëzit derisa policia t'i arrestojë ata. Ndërsa filloi shtetrrethimi brenda natës, kryetarja e Bashkisë së LA, Karen Bass shkroi në “X” se ai ishte krijuar për të “ndaluar aktorët e këqij që po përfitojnë nga përshkallëzimi kaotik i presidentit”. “Një javë më parë gjithçka ishte paqësore. Gjërat filluan të bëhen të vështira të premten kur edhe u bënë bastisjet”, tha më tej ajo. Bass sugjeroi që Los Angeles ishte “pjesë e një eksperimenti kombëtar për të përcaktuar se sa larg mund të shkojë qeveria federale në marrjen e pushtetit nga një qeveri lokale, nga një juridiksion lokal”. Ajo poashtu i bëri thirrje më parë administratës që t'i japë fund bastisjeve. Gjatë natës të së martës në të mërkurën, policia e Los  Angeles tha se bëri “arrestime masive” pas ditës së pestë të protestave për aksionin e imigracionit.