Transplanti i parë i zemrës nga derri te njeriu tregoi ndryshime në sinjalet elektrike

  Nuk u bë ende një vit pas transplantimit të parë ndonjëherë të një zemre derri tek një njeri. Mjekët po raportojnë se zemra shfaqi ndryshime të papritura në sistemin e saj elektrik përpara se pranuesi të vdiste. Ndryshimet nuk besohet se kanë kontribuar në vdekjen e pacientit. Por ekspertët thanë se vëzhgimi do të ndihmojë në përgatitjen për çdo transplantim të tillë në të ardhmen. 57 vjeçari David Bennett, vdiq dy muaj pasi iu nënshtrua procedurës së transplantit në janarin e kaluar. Atij iu transplantua një zemër derri që ishte modifikuar gjenetikisht për të ndihmuar në zvogëlimin e mundësive që sistemi i tij imunitar ta refuzonte atë. Bennett ishte shtruar në spital për tetë javë me një aritmi të zemrës kërcënuese për jetën. Kështu që mjekët e tij në Universitetin e Mjekësisë në Maryland morën miratimin nga Administrata Amerikane e Ushqimit dhe Barnave për të kryer transplantin e parë të zemrës nga derri te njeriu në botë. Procedura u konsiderua si një sukses i hershëm, sepse zemra funksionoi mirë, pa shenja të dukshme refuzimi, për dy muaj. Por pasi Bennett vdiq, mjekët e tij përcaktuan se shkaku ishte dështimi i zemrës, për shkak të një "grupi kompleks faktorësh". Sipas mjekëve monitorimi i elektrokardiogramit në javët pas procedurës tregoi se sinjalet elektrike po udhëtonin më ngadalë se një zemër derri në trupin e një derri. Në z. Bennett, fatmirësisht nuk pamë kurrë nevojë për ndërhyrje," tha mjeku Timm Dickfeld. "Ne jemi të qetë të themi se nuk besojmë se kjo ka kontribuar në vdekjen e tij." Koncepti i transplanteve të organeve ndër-specie, i quajtur ksenotransplantim ka qenë duke u studiuar për vite me rradhë. Në vitin 2021, SHBA-ja regjistroi një numër rekord të transplanteve të organeve të donatorëve, sipas Rrjetit të Bashkuar për Ndarjen e Organeve, shkruan USnews, transmeton Klankosova.tv. Për të transplantuar një zemër derri në një njeri, duhet të adresohen edhe disa sfida të mëdha, tha Dickfeld. ”Refuzimi i sistemit imunitar të organit, infeksioni dhe mundësia e ritmeve jonormale të zemrës”. Zemra e derrit u modifikua gjenetikisht për të pakësuar shanset e refuzimit të sistemit imunitar, megjithëse Bennett kishte ende nevojë për ilaçe. Një faktor i mundshëm, tha  mjeku tjetër Muhammad Mohiuddin është zgjidhja e përdorur për të ruajtur zemrën e derrit pasi të jetë korrur. Ai përfshinte hormone të tilla si adrenalina dhe kortizoli, si dhe kokainë e tretur./Klankosova.tv/.