Trajneri i Gironas synon të jetë pasuesi i Guardiolas te City

Trajneri i Gironas, Michel Sanchez beson se është gati të bëjë një hap të madh në karrierën e tij dhe të drejtojë Manchester Cityn nëse i jepet mundësia. Tekniku spanjoll është në krye të Girona FC, klub i City Football Group, që nga viti 2021. “E shoh veten gati [për të drejtuar Cityn], e shoh veten gati të drejtoj çdo ekip”, tha ai, teksa shtoi duke qeshur: “Nuk e di nëse ata (City) e shohin kështu. Natyrisht nuk është e njëjta gjë [të drejtosh Gironan apo Cityn]. Nuk kam një shkop magjik për të menaxhuar çdo lloj egoje, por kam aftësinë për t’u përshtatur dhe dua ta përjetoj këtë”. Pep Guardiola, 55 vjeç, do të festojë këtë verë 10-vjetorin si trajner i Cityt. Ai ka kontratë me klubin deri në qershor 2027. Megjithatë, ka pasur dyshime nëse ai do të vazhdojë në Etihad Stadium përtej këtij sezoni, pasi ish-trajneri i Barcelonës shmangu pyetjet për të ardhmen pas eliminimit nga Real Madridi në UEFA Champions League me rezultat të përgjithshëm 5-1. Ndërkohë, Michel thotë se po përgatitet në rast se një kalim i mundshëm në Premier League bëhet realitet. “Kam një mësues të anglishtes dhe po punoj vazhdimisht”, tha ai. Michel, i cili e nisi karrierën si trajner te Rayo Vallecano, klub ku kaloi pjesën më të madhe të karrierës si lojtar, ka bërë një ndikim të madh te Girona. Pasi e ngjiti ekipin në LaLiga në sezonin e tij të parë, ai u shpall trajneri i vitit në LaLiga për sezonin 2023-24, pasi Girona përfundoi në vendin e tretë dhe u kualifikua për herë të parë në historinë e klubit në Champions League. Girona, që mposhti Barcelonën 2-1 muajin e kaluar dhe barazoi 1-1 me Real Madridin në nëntor, aktualisht renditet në vendin e 12-të në LaLiga. /Klankosova.tv