Tragjedia në Austri, Hasani: Gruaja nga Kosova u vra me kaçavidë nga ish-burri (VIDEO)

Një ngjarje tragjike që ndodhi pasditen e së dielës ka tronditur opinionin publik në Austri. Sipas mediave austriake, njw grua nga Kosova, Zoja Oroshi, dyshohet se është vrarë nga ish-bashkëshorti i saj. Ky rast i rëndë dhe tejet i ndjeshëm u trajtua edhe në emisionin “Ora 7” në Klan Kosova, ku i ftuar ishte historiani Nexhmedin Hasani, i cili jeton dhe vepron në Austri. Ai bëri të ditur se i dyshuari e ka kryer krimin me një kaçavidë, ndërsa ndau edhe detaje të tjera lidhur me rastin. "Çifti në fjalë ka qenë i shkurorëzuar dhe ka qenë ish-bashkëshorti i saj i cili ka kryer aktin makabër. Nga ajo që e kemi deri më tani, autorit iu është gjetur edhe një armë e zjarrit në banesën e tij dhe shteti austriak ka marrë masat paraprake", deklaroi Hasani. Historiani theksoi se çifti i divorcuar kanë pasur së bashku katër fëmijë. "Nuk dihen motivet apo problematikat që janë shfaqur në mes tyre. Sidoqoftë i tërë opinioni shqiptar në Austri ka mbetur i shokuar nga ky rast. Rasti ka sjellë edhe reagimin e autoriteteve austriake, konkretisht Ministres së Drejtësisë Anna Sporrer", theksoi ai. Lidhur me tragjedinë Klankosova.tv ka raportuar edhe gjatë ditës së djeshme. Po ashtu, i janë adresuar edhe pyetje Policisë dhe Prokurorisë austriake për të marrë detaje shtesë lidhur me rastin./Klankosova.tv https://www.youtube.com/watch?v=VYaWEdG8j6A https://klankosova.tv/krimi-ne-austri-kjo-eshte-gruaja-nga-kosova-qe-dyshohet-se-e-vrau-ish-burri111/