Tragjedi në resortin e skive në Gjeorgji, 12 persona vdesin në dhomat e gjumit

12 persona kanë vdekur nga helmimi me monoksid karboni në një stacion skish në Gjeorgji, tha policia të hënën.

Trupat e 11 të huajve dhe një shtetasi gjeorgjian u gjetën në dhomat e gjumit në katin e dytë mbi një restorant indian në stacionin e skive të Gudauri, në veri të vendit të Kaukazit, tha policia, transmeton Klankosova.tv.

Një zëdhënës tha se “testet paraprake nuk tregojnë asnjë gjurmë dhune në trupa”. Sipas Ministrisë së Brendshme të Gjeorgjisë, njerëzit supozohet se ishin punonjës të restorantit.

Ministria ka nisur një hetim lidhur me vdekjet. Hetimi fillestar zbuloi se një gjenerator i energjisë elektrike, i cili ndodhej në një hapësirë ​​të mbyllur pranë dhomave të gjumit ku flinin 12 personat, ishte ndezur një ditë më parë pas një ndërprerjeje të energjisë.

Hetuesit po përpiqen të përcaktojnë nëse ky mund të ketë qenë shkaku i grumbullimit të monoksidit të karbonit që thuhet se helmoi 12 viktimat.