Me urdhër të Prokurorisë së Posaçme, policia po zhvillon një operacion në Elbasan, Tiranë dhe Durrës, ku janë firmosur 15 masa sigurie, për persona që akuzohen si pjesë e një grupi kriminal që merren me trafikun ndërkombëtar të drogës.
Operacioni nisi që në orët e para të mëngjesit të së premtes, ndërsa emrat e të dyshuarve kanë dalë pas zbërthimit të aplikacionit Sky ECC, në sajë të hetimeve që janë duke u ndjekur për dosje të tjera kriminale, shkruan A2CNN, transmeton Klankosova.tv.
Katër prej urdhërarresteve të firmosura nga prokurori Vladimir Mara ndodhen në burg për vepra të tjera penale, ku u është komunikuar edhe masa e re e sigurisë. Njëri prej tyre mësohet se është Ervis Çela, i arrestuar një muaj më parë me akuzën e vrasjes.
Burime pranë organit të akuzës bëjnë me dije se të dyshuarit janë anëtarë të grupit të Çopjave të Elbasanit, mes të cilëve edhe Franc Çopja, i cili ndodhet i arrestuar në Belgjikë. Policia ekzekutoi 3 urdhër arreste dhe pjesa tjetër vijojnë të jenë në kërkim.
Grupi kriminal i goditur nga SPAK akuzohet se trafikonte lëndë narkotike nga vendet e Amerikës Latine drejt Evropës.
●●●
SZSHKRIMI NGA
Sh Z
Editorial nga Klan Kosova — ndjek lajme dhe zhvillimet e tjera kryesore të vendit.
