Trafik armësh nga Kosova, kapen 10 pistoleta, do shiteshin për tre mijë euro në Tiranë

Dhjetë armë zjarri të llojit pistoletë janë sekuestruar nga policia gjatë operacionit “Transportuesi 2”, ku është goditur një grup kriminal që trafikonte armë zjarri nga Kosova në Tiranë. Armët e zjarrit janë gjetur në bagazhet e një autobusi të parkuar në një terminal në Lundër. “Gjatë operacionit, në vendparkimin e një terminali autobusësh, në Lundër, u kapën dhe arrestuan në flagrancë shtetasit: B. K., 28 vjeç, B. Sh., 20 vjeç, E. Th., 25 vjeç, dhe M. K., 20 vjeç, të gjithë banues në Kosovë. Shtetasi B. K. dyshohet se ka vënë në autobusin me drejtues shtetasin E. Th., një çantë brenda së cilës u gjetën 10 armë zjarri pistoleta, 10 krehra dhe sasi municioni luftarak. Më pas, shtetasi B. K., në bashkëpunim me shtetasin M. K., kanë ndjekur me automjetin e tyre, autobusin, gjatë gjithë itinerarit. Po nga verifikimet e kryera dyshohet se pronari i linjës së autobusëve, shtetasi E. Th., së bashku me shtetas të tjerë, ka trafikuar armë zjarri drejt Shqipërisë, në disa raste. Në cilësinë e provës materiale u sekuestruan 10 armë zjarri pistoleta, me krehra dhe municion luftarak, 1 automjet dhe 5 celularë.” Policia ka vënë në pranga katër të rinj nga Kosova, të cilët kishin organizuar trafikun e armëve dhe kishin për qëllim shitjen e tyre në vlerat një mijë e 500 deri në tre mijë euro, shkruan A2cnn.