Timoni i mauneve në Amerikë, në duart e malësores shqiptare (VIDEO)

Pasion të madh e ka maunën. Madje këtë s'ia ndalon as bora e as shiu por as edhe kilometrat e tejzgjatura. Ditët e netët shpesh janë të gjata për malsoren Nurije Mehaj, që drejton kamionin me tonazh të madh nepër autostradat e Shteteve të Bashkuara të Amerikës. Mehaj e cila vendlindjen e saj e ka nga "Hoti i Vendit" në Plavë e Guci, është gruaja e vetme në SHBA që e bën këtë punë për disa dekada, kështu duke treguar forcën dhe vendosmërinë e femrës shqiptare për t'i përballuar vështirësitë. Ajo për klankosova.tv ka folur rreth jetës saj në Shtetet e Bashkuara të Amerikës. "Në SHBA kam ardhur para gati 30 vjetëve, pra nga viti 1994 jetoj këtu. Në fillim ishte e vështirë, por me kalimin e kohës u mësova dhe tani nuk kam asnjë vështirësi", tha ajo. Shqiptarja nga Plava e Gucia, tregoi se si filloi punën si shofere e maunës. "Patentën e kam marrë nga viti 2004. Konkursin e kam parë në gazeta. Më pëlqen shumë dhe natyrisht paguhet mirë. Sigurisht, fillimi ka qenë i vështirë por tani e bëj pa vështirësi dhe pa ndonjë problem", theksoi Mehaj. Nurije Mehaj, shtoi se është mirëpritur nga kolegët e saj. "Nuk jam paragjykuar nga kolegët e mi. Të gjithë më kanë respektuar dhe jam pëlqyer nga ata shumë", shtoi Mehaj. Ajo tregoi se ka punuar për disa kompani të njohur amerikane, por se tani e ka në plan të hap kompaninë e saj duke e punësuar edhe burrin. "Kam punuar për disa kompani si C.R England, Wanch dhe të tjera. Por tani jam duke punuar për veten time dhe kam punësuar burrin tim dhe së shpejti do të regjistroj kompaninë time", tha ajo në një intervistë për klankosova.tv. Nurije Mehaj shpesh udhëtimet e saja për në destiacionet e largëta i shoqëron me muzikë të bukur shqipe/Klankosova.tv