Tifozëve të skuadrës izraelite i ndalohet udhëtimi në Angli për ndeshjen evropiane

Tifozëve të skuadrës izraelite të futbollit Maccabi Tel Aviv u është ndaluar të marrin pjesë në ndeshjen e Europa League kundër Aston Villa në Mbretërinë e Bashkuar muajin e ardhshëm, për shkak të shqetësimeve lidhur me sigurinë, ka bërë të ditur klubi anglez. Grupi Këshillues i Sigurisë i qytetit të Birminghamit (SAG) – organi përgjegjës për lëshimin e certifikatave të sigurisë për ndeshjet në stadiumin Villa Park, ku do të luhet ndeshja – i ka bërë me dije Aston Villës se tifozët e Maccabi Tel Aviv nuk do të lejohen të marrin pjesë. Aston Villa konfirmoi të enjten në një deklaratë se “klubi është informuar se asnjë tifoz mysafir nuk mund të marrë pjesë në ndeshjen e UEFA Europa League kundër Maccabi Tel Aviv më 6 nëntor, pas një udhëzimi nga Grupi Këshillues i Sigurisë (SAG)”. “Policia i ka bërë me dije SAG se ka shqetësime për sigurinë publike jashtë stadiumit dhe për aftësinë për të përballuar çdo protestë të mundshme gjatë mbrëmjes,” thuhet në deklaratën e klubit.