Tentim vrasja në Vranjevc, një muaj paraburgim për njërin nga të dyshuarit

Një person është arrestuar dhe ndodhet në paraburgim prej 30 ditësh, ndërsa katër të tjerë janë liruar lidhur me tentim vrasjen në Vranjevc, rasti ky i ndodhur më 31 janar. Të shtunën e 31 janarit, në rrugën “Fahri Fazliu” në Prishtinë u raportua për të shtëna me armë, ndërsa pas këtij konflikti ndërmjet dy grupeve personash, mosmarrëveshja ka vazhduar në një lokacion tjetër të qytetit, ku një veturë është përdorur si mjet rrezikimi ndaj personave, duke u shkaktuar lëndime trupore disa qytetarëve, ndërsa dyshohet edhe për të shtëna me armë zjarri nga vetura në lëvizje, transmeton Klankosova.tv. Njësitë policore kanë reaguar menjëherë, kanë dalë në vendngjarje dhe kanë kryer ekzaminime të plota kriminalistike dhe forenzike, me ç’ rast janë sekuestruar: gëzhoja dhe fragmente predhash, municion, mjete të forta, si dhe, vetura e dyshuar e përfshirë në rast. Sipas policisë, të gjitha veprimet operative dhe hetimore janë zhvilluar në koordinim të plotë me Prokurorin e Shtetit, ndërkohë që është iniciuar hetim në drejtim të veprave penale: “Vrasje në tentativë”, “Shkaktim i rrezikut të përgjithshëm” dhe “Mbajtja e paautorizuar e armëve”. “Si rezultat i punës intensive hetimore: Janë identifikuar dhe intervistuar të gjithë personat relevantë të përfshirë në rast, janë siguruar video-incizime nga kamerat e sigurisë dhe prova të tjera materiale, janë realizuar tri bastisje në lokacione të ndryshme, janë konfiskuar dy armë zjarri dhe prova shtesë me rëndësi për procedurën penale, janë identifikuar gjithsej pesë persona të dyshuar; njëri prej tyre, me iniciale A.T., është arrestuar dhe ndodhet në paraburgim prej 30 ditësh, ndërsa katër persona të tjerë janë liruar në procedurë të rregullt”, thuhet tutje në njoftim. “Policia e Kosovës mbetet e përkushtuar fuqishëm në garantimin e rendit, ligjit dhe sigurisë publike, duke mos toleruar asnjë formë dhune apo rrezikimi të jetës së qytetarëve”. https://klankosova.tv/tentim-vrasja-perdori-veturen-ne-vend-te-armes-video-11/