Lajmet e fundit
111 tenderë i fitoi kompania "Ardhmëria" për 4 vjet, 88 prej tyre vetëm pas ardhjes në pushtet të Vetëvendosjes në Shtime. Mirëpo, për asnjërin nga tenderët, sipas të dhënave online në Gjykatën e Tenderëve, nuk u ankua asnjë kompani.
Në sistemin elektronik të Organit Shqyrtues të Prokurimit figuron vetëm një ankesë e vitit 2020.
E avokati Admir Salihu e ka një shpjegim se pse janë të shpeshta rastet kur kompanitë nuk ankohen për tenderë.
Procedurat e prokurimit, ai thotë se janë çështje të komplikuara, për të cilat prokurorët, gjyqtarët, hetuesit por edhe avokatët kanë pak njohuri. Rrjedhimisht, edhe gjykata e cila është kompetente për zgjidhjen e lëndëve të prokurimit, avokati pohon se është krejtësisht e paefektshme.
Sa i përket rastit të kompanisë "Ardhmëria" e cila ka fituar 88 tenderë nga Komuna e Shtimes për më pak se 4 vjet, avokati thotë se nuk ka asnjë ndalesë ligjore. Megjithatë, Salihu deklaron se janë tri hallka ose filtra të cilat janë përgjegjëse për të shmangur parregullsitë dhe shkeljet në tenderë.
Mirëpo, sipas Salihut, veprimi i cili do të eliminonte keqpërdorimet më të mëdha në aktivitetet e prokurimit, është ndryshimi i kriterit kryesor të vlerësimit të tenderëve.
Avokati thekson edhe nevojën e madhe që kanë institucionet e hetuesisë dhe drejtësisë për hetues të cilët kanë njohuri për Prokurimin Publik.
