Telekomi pret që përmbaruesi privat, Ilir Mullhaxha, të shkarkohet nga detyra

Telekomi tha se pret që përmbaruesi privat, Ilir Mullhaxha të shkarkohet nga detyra për shkeljet, sipas tyre, të bëra në çështjen përmbarimore të Telekomit. “Telekomi i Kosovës edhe një herë e informon publikun se tashmë Gjykata Kushtetuese e Kosovës, me aktgjykimin KI84/21, ka konstatuar shkeljet serioze në dëm të debitorit Telekomi, duke përfshirë procedurën përmbarimore dhe gjyqësore, e të cilat kanë rezultuar në dëme milionëshe kundër pasurisë publike të Telekomit të Kosovës si ndërmarrje publike”. “Pas kthimit të rastit në rigjykim nga Gjykata Kushtetuese, në aktvendimin e Gjykatës Komerciale është vërtetuar fakti që përmbaruesi ka përfshirë në urdhër përmbarimor shuma që tejkalojnë vlerën e paraparë në Vendimin e Arbitrazhit”, thuhet në reagimin e Telekomit, transmeton Klankosova.tv. Tutje, sipas Telekomit, urdhri përmbarimor ka përfshirë shuma prej miliona euro përtej dokumentit përmbarimor apo vendimit të arbitrazhit. “Telekomi i Kosovës ka pritje që sistemi gjyqësor dhe prokurorial do të ushtrojnë kompetencat e tyre dhe ndërmarrin hapat e nevojshëm të vendosjes së drejtësisë dhe sqarimit të plotë të dëmeve dhe zhvatjeve, të cilat i janë shkaktuar pasurisë publike të Telekomit, në kuadër të rasteve që veçse janë iniciuar”, thuhet në reagim.