Tejkaluan shpejtësinë, policia ndëshkon me 900 euro tre shoferë në Ferizaj

Policët e Njësisë së Komunikacionit Rrugor në Ferizaj kanë shqiptuar masa ndëshkuese ndaj tre shoferëve për shkelje të rënda të rregullave të komunikacionit rrugor, konkretisht për tejkalim të shpejtësisë së lejuar. Policia bën të ditur se më 11 nëntor, rreth orës 21:20, në rrugën magjistrale Ferizaj – Prishtinë, në Babush në zonën me kufizim shpejtësie 50 km/h, është ndaluar shoferi A.B. 22 vjeçar, i cili drejtonte automjetin VW Golf me targa vendore me shpejtësi 124 km/h. Ndaj tij policia ka shqiptuar gjobë prej 300 eurosh, 3 pikë negative dhe masë mbrojtëse, heqje e patentë-shoferit për 3 muaj, transmeton Klankosova.tv. Ndërkaq, më datë 12 nëntor, rreth orës 18:30, në rrugën transitore Shtime – fshati Belincë, në zonën me kufizim shpejtësie 60 km/h, janë ndaluar shoferët: J.C. (39 vjeç), i cili drejtonte automjetin Audi me targa vendore me shpejtësi 123 km/h, D.A. (26 vjeç), i cili me automjetin Audi me targa vendore zhvillonte shpejtësi 126 km/h. Ndaj të dyve policia ka shqiptuar nga një gjobë prej 300 eurosh dhe masë mbrojtëse – heqje e patentë shoferit për 3 muaj Policia ka bërë të ditur se njërit prej tyre nuk i janë shqiptuar pikët negative pasi posedonte patentë shoferi të huaj.