Të rinjtë shqiptarë më larg alkoolit, por më pranë kokainës

Të rinjtë dhe adoleshentët shqiptarë po konsumojnë gjithmonë e më pak pije alkoolike. Studimet e fundit, në të cilat bazohet Euronews.al, tregojnë se brezat e rinj po i largohen këtij vesi, që e rendiste rajonin evropian në vendin e parë për alkoolpirjen. Edhe më alarmante e bëjnë situatën mjekët toksikolog, të cilët thonë se sot trend është përdorimi i kokainës i kombinuar më alkool nga të rinjtë, transmeton Klankosova.tv. “Me kalimin e kohës përdorimi i substancave është rritur. Në urgjencë, por edhe në shërbimin e toksikologjisë, pacientët që kërkojnë ndihmë për alkoolin dhe substancat janë shtuar. Flasim për moshën mbi 14 vjeç që janë prezentë në pjesën e urgjencës. Kemi konsumimin e marijuanës, kokainës dhe të alkoolit, por edhe drogave të ndryshme sintetike që mund të jenë në qarkullim. Kokaina dhe alkooli po përdoren më shumë. Grupmosha më e shpeshtë që vjen janë të rinjtë”, tha Matilda Kambo, Toksikologe në QSUT. Toksikologët thonë se të rinjtë që janë eksperimentues apo përdorues të rregullt të lëndëve narkotike paraqiten në urgjencë me shenja klinike si gjendje ankthi, rrahje të shpeshta të zemrës, ndjesi sikur po mbyten, paranoja akute, humor i shtuar. Ata theksojnë se përdorimi i drogës, krahas varësisë, sjell edhe shqetësime shëndetësore, përfshi ato që lidhen me shëndetin mendor.