Të përbashkëtat Speciale

Superylli i Manchester United, Zlatan Ibrahimovic, ka thënë se ai dhe trajneri i tij Jose Mourinho ndajnë së bashku një mentalitet prej fituesish që do t’i sjellë sukses, United-it, shkruan Goal, njofton Klan Kosova. Dyshja kishin fituar bashkë Serien A me Interin në sezonin 2008/09 para se Ibra t’i bashkohej Barcelonës. Ibrahimovic, 34 vjeçar, ka shkëlqyer në ndeshjet e para për United nën urdhrat e Mourinhos, duke shënuar tre gola në tri ndeshjet e para në Premier Ligë. Lojtari ishte i mbushur me lëvdata për trajnerin para derbit lokal me Manchester City-in dhe “armikun” e tyre të kamotshëm Pep Guardiolën, të shtunën. “E njoh tash e një kohë (Mourinhon). E di çfarë do ai dhe çfarë mund të marrë”, ka thënë Ibrahimovic për BBC-në. “Ai është një fitues dhe ashtu jam edhe unë. Unë bëj gjithçka për fitore dhe ai është i njëjtë. Ai ka fituar, unë kam fituar, kemi fituar kur kemi qenë më të ri dhe do të fitojmë edhe tash që jemi pak më të vjetër. Kudo që ai shkon fiton. Me Porton ai ka fituar Ligën e Kampionëve. Askush nuk e ka pritur këtë”. “Në një kohë të shkurtër ai arrin shumë sukses". Suedezi thotë që ai ndanë edhe një veti tjetër me trajnerin e tij – ndershmërinë. “Është njeri i drejtpërdrejtë me të gjithë. Ai nuk flet pas shpine, por ta thotë troç”. “Nëse nuk je mjaftueshëm i mirë, atëherë nuk je dhe ai ta thotë”. “Ai bënë gjithçka që është e mundur për të fituar dhe e siguron fitoren. Edhe unë jam i njëjtë. S’e pranoj humbjen”.

klankosova.tv