Lajmet e fundit
Ministri i Kulturës, Kujtim Shala, ka vizituar Institutin për Mbrojtjen e Monumenteve të Kosovës, ku është takuar me drejtorin e këtij institucioni, Alban Bakia, dhe anëtarët e Këshillit Drejtues, me të cilët bisedoi për programin e këtij institucioni për këtë vit, por edhe për rolin dhe rëndësinë që ka ky institucion në ruajtjen e trashëgimisë kulturore të Kosovës.
Drejtuesit e këtij institucioni e informuan ministrin me punët dhe programin e këtij institucioni për këtë vit, me një theks të veçantë me punët që po bëhen në konsolidimin e mëtejmë të tij, në funksion të shtimit të kapaciteteve për të ruajtur trashëgiminë kulturore të Kosovës.
Ministri i Kulturës, drejtuesve të këtij institucioni iu premtoi mbështetje, dhe u shpreh se IMMK-ja është institucion jashtëzakonisht i rëndësishëm, i cili kujdeset për ruajtjen e trashëgimisë së Kosovës.
Gjatë takimit u fol edhe rreth rëndësisë që ka gjetja e mekanizmave për ruajtjen trashëgimisë kulturore e Kosovës, transmeton Klan Kosova.
