Taravari: Është mirë për shtetin që një herë të ketë president nga bashkësitë tjera etnike në Maqedoni

Kandidati i VLEN-it, për president të Maqedonisë së Veriut, Arben Taravari, ka deklaruar se nëse dëshirohet që të funksionojë shteti, atëherë është e patjetërsueshme,transparenca dhe inkluziviteti.

Sipas tij, për shtetin është mirë që një herë të ketë president nga etnitë e tjera, edhe pse thotë, realisht ende nuk janë pjekur kushtet që njerëzit të votojnë për person dhe jo për parti.

“Të gjithë njerëzit kanë anët e mira dhe mangësitë. Mendoj që në Maqedoni është mirë të ndodh që njëherë presidenti i shtetit të jetë nga bashkësitë e tjera etnike, edhe pse realisht mendojë se ende nuk janë pjekur kushtet të votojmë për person. Në përgjithësi, këtu njerëzit janë shumë të partizuar edhe pse në zgjedhjet presidenciale dhe lokale qytetarët më tepër votojnë për personin dhe jo për partinë”, tha Taravari për agjencinë e lajmeve MIA.

Taravari theksoi se ka gjasa reale në raundin e dytë dhe shpreson në përkrahje jo vetëm të votuesve shqiptarë por edhe të bashkësive tjera etnike.