Suns fiton ndeshjen e dytë ndaj Clippers me koshin “vrastar” alley oop të Deandre Ayton

Kishte mbetur më pak se një sekond lojë. Por, për t’u llogaritur krejtësisht e përfunduar ndeshja me Phoenix Suns dhe LA Clippers, duhej luajtur edhe ajo copë kohë prej 0.9 sekonda. Dhe topi që duhej të rivëhej në fushë nga “auti”, ishte i ekipit të parë. E për kaq pak kohë, nuk mund të bëhet asnjë gjë tjetër në basketboll, pos të preket topi. Ose të kapet dhe të lëshohet menjëherë. Dhe pikërisht këtë e bëri Deandre Ayton i vendasve të Phoenix Suns. Atij i mjaftoi koha minimaliste prej vetëm 0.9 sekonda për ta kapur topin, për ta lëshuar menjëherë në kosh dhe për të shënuar, ndoshta, dy pikët më të vlefshmet në karrierën e tij të deritashme në NBA. Me këtë alley oop ai ia vodhi fitoren Clipersave, për t’ia kaluar atë ekipit të tij, Suns. https://www.youtube.com/watch?v=41R1ld_s5RA Deri te koshi i tij i 0.9 sekondave të fundit, LA po udhehiqte 103 me 102. Madje, Paul George i mysafirëve huqi dy gjuajtje të lira, 9 sekonda para fundit të lojës. Me shënimin e Ayton, që iu shmang për mrekulli kroatit Ivica Zubac të Clippers, Phoenix fitoi dhe e qoi në dy serinë e triumfeve në finalen e Konferencës Perëndimore. Kjo copë loje, e cilësuar si një taktike perfekte, mund t’ë shërbejë si një manual për të gjitha ato ekipe dhe ata lojtarë që e gjejnë vetën në kësi situate të ngjashme, në të ardhmen.