Lajmet e fundit
Një spital i fëmijëve është dëmtuar rëndë në kryeqytetin ukrainas Kiev nga sulmet ruse, pasi 31 persona u vranë në të gjithë vendin gjatë sulmeve ruse me raketa që ndodhën mëngjesin e së hënës.
Të paktën 17 persona u vranë në Kiev nga sulmi i rrallë gjatë ditës, duke përfshirë dy që vdiqën në Spitalin e Fëmijëve Ohmatdyt - objekti më i madh pediatrik në Ukrainë - i cili pësoi dëme të mëdha gjatë shpërthimit.
Kreu i administratës ushtarake në qytetin qendror të Ukrainës, Kryvyi Rih, tha se të paktën 10 persona ishin vrarë atje, me tre të tjerë të vrarë në qytetin lindor të Pokrovsk dhe një në Dnipro, raporton BBC, transmeton Klankosova.tv.
Presidenti ukrainas Volodymyr Zelensky, i cili po viziton Poloninë ku nënshkroi një pakt sigurie, u zotua të hakmerret.
"Qytete të ndryshme: Kiev, Dnipro, Kryvyi Rih, Sloviansk, Kramatorsk. Më shumë se 40 raketa të llojeve të ndryshme. Ndërtesat e banimit, infrastruktura dhe një spital për fëmijë u dëmtuan", shkroi Zelensky më herët në mediat sociale.
