Lajmet e fundit
Sulmet izraelite gjatë natës kanë vrarë të paktën 29 persona dhe kanë plagosur 25 në të gjithë Gazën, sipas zyrtarëve lokalë.
Në qytetin jugor të Rafahut, 21 njerëz u vranë, përfshirë fëmijë, kur sulmet ajrore shënjestruan një zonë banimi dhe goditën 11 shtëpi, sipas Drejtorisë së Mbrojtjes Civile në Gaza, raporton BBC, transmeton Klankosova.tv.
"Ekipet tona në Rafah janë ende duke u marrë me shënjestrimin e shumëfishtë të shtëpive të banuara dhe të pabanuara, duke rezultuar në dhjetëra të vdekur, të plagosur dhe të tjerë të zhdukur nën rrënoja", tha DMCG-ja.
Në qytetin e Gazës, dy persona u vranë dhe pesë u plagosën pasi një sulm ajror goditi një ndërtesë apartamentesh pranë kryqëzimit Samar në qendër të qytetit. Viktimat u dërguan në spitalin Baptist al-Ahli, sipas zyrtarëve mjekësorë.
Në Deir el-Balah, Gaza qendrore, gjashtë persona u vranë dhe 20 u plagosën në një sulm ajror në një shkollë të agjencisë së OKB-së në Nuseirat, tha Spitali i Martirëve Al-Aksa për CNN.
Ushtria izraelite konfirmoi sulmin ndaj kompleksit të Agjencisë së Kombeve të Bashkuara për Ndihmën dhe Punët për Refugjatët Palestinë (UNRWA).
