Lajmet e fundit
Tetë persona janë plagosur në një sulm të dhunshëm me mjete ndezëse në Kolorado të SHBA-së, gjatë një tubimi në mbështetje të pengjeve izraelite në Gaza.
Policia në Boulder tha se një burrë, duke bërtitur “Liri për Palestinën”, hodhi koktej Molotovi ndaj pjesëmarrësve të një marshimi paqësor të organizuar nga grupi pro-izraelit Run for Their Lives, i cili zhvillon aktivitete të rregullta në Pearl Street Mall – një hapësirë e njohur publike në qytet, rreth 48 km larg Denverit. Të lënduarit janë të moshës nga 52 deri në 88 vjeç dhe disa prej tyre kanë marrë djegie serioze. Mes të plagosurve është edhe një i mbijetuar i Holokaustit, sipas Rabinit Israel Wilhelm nga Chabad në Universitetin e Kolorados, raporton BBC, transmeton Klankosova.tv. Shefi i Policisë së Boulderit, Stephen Redfearn, tha se ngjarja u raportua rreth orës 13:26 me kohë lokale, ndërsa në vendin e ngjarjes u gjetën pajisje ndezëse, përfshirë një lloj lëshuesi flake të improvizuar dhe kokteje Molotovi. Sipas FBI-së, ky incident po hetohet si një sulm i dyshuar terrorist. Pamjet e kapura nga vendi i ngjarjes tregojnë sulmuesin gjysmë të zhveshur, teksa bërtiste ndaj pjesëmarrësve dhe mbante në duar shishe të ndezshme, në momentin kur u arrestua. Ky është sulmi i dytë i profilit të lartë në SHBA brenda dy javëve, që lidhet me konfliktin në Gaza. Më 22 maj, një person që gjithashtu bërtiste “Liri për Palestinën”, qëlloi për vdekje dy punonjës të ambasadës izraelite jashtë një muzeu hebre në Washington DC.
