Sulm i armatosur në klinikën e rehabilitimit në Meksikë, nëntë të vrarë e pesë të plagosur

Të paktën nëntë persona humbën jetën dhe pesë të tjerë u plagosën në një sulm të armatosur në një klinikë për shërimin e varësisë në veriperëndim të Meksikës, njoftuan autoritetet lokale. Të maskuar dhe të armatosur me pushkë, ata sulmuan klinikën herët në mëngjes, transmeton klankosova.tv. Ata hapën me forcë portën e objektit dhe filluan të qëllonin mbi pacientët dhe stafin. Policia arriti në vendngjarje pas disa thirrjeve në linjën e urgjencës, ku konfirmoi viktimat dhe të plagosurit. Sipas policisë, tetë persona vdiqën në vendngjarje, ndërsa një tjetër humbi jetën disa orë më vonë pasi u dërgua në spital për trajtim, shkruan bnonews. Ky sulm është pjesë e një serie sulmesh të ngjashme që kanë ndodhur në qendrat e rehabilitimit të drogës në Sinaloa, që nga shtatori i vitit të kaluar. Zona është dëshmitare e përleshjeve të ashpra ndërmjet dy grupeve rivale të kartelit Sinaloa, një konflikt që ka shkaktuar më shumë se 750 të vdekur dhe 900 të zhdukur deri tani. Autoritetet po hetojnë lidhjen e këtij sulmi me luftën midis grupeve të drogës në këtë rajon dhe intensifikimin e dhunës pas dërgimit të forcave të sigurisë në zonë.