Suedia ndalon testimin për COVID-19 pas heqjes se masave kufizuese

Suedia ka ndalur testimin në shkallë të gjerë për COVID-19 edhe te njerëzit që shfaqin simptoma të një infeksioni, duke mbyllur kështu të gjitha vendet mobile që ishin për testime. Kjo lëvizje e vë kombin skandinav në kundërshtim me pjesën më të madhe të Evropës, por disa ekspertë thonë se mund të bëhet normë pasi testimi i kushtueshëm sjell më pak përfitime me variantin “Omicron” lehtësisht të transmetueshëm, por më të butë dhe ndërsa qeveritë fillojnë të konsiderojnë trajtimin e COVID-19 si të tjerët, shkruan AP-ja, transmeton Klankosova.tv. "Ne kemi arritur një pikë ku kostoja dhe rëndësia e testimit nuk janë më të justifikueshme", tha shefi i Agjencisë Suedeze të Shëndetit Publik, Karin Tegmark Wisell. “Nëse do të kishim testime të gjera të përshtatura për të gjithë ata që kanë COVID-19, kjo do të kushtonte gjysmë miliardi korona në javë (rreth 55 milionë dollarë) dhe 2 miliardë në muaj (220 milionë dollarë),” shtoi Tegmark Wisell. Duke filluar nga e mërkura, vetëm punonjësit e kujdesit shëndetësor dhe të kujdesit për të moshuarit dhe më të rrezikuarit do të kenë të drejtën për testim PCR falas, nëse janë simptomatikë, ndërsa pjesës tjetër të popullsisë thjesht do t'i kërkohet të qëndrojë në shtëpi, nëse shfaq simptoma që mund të jenë të COVID-19. Testet e antigjenit janë lehtësisht të disponueshme për t'u blerë në supermarkete dhe farmaci, por ato rezultate nuk raportohen tek autoritetet shëndetësore. Ofruesit privatë të kujdesit shëndetësor mund të kryejnë gjithashtu teste dhe të ofrojnë certifikata për udhëtime ndërkombëtare, por kostoja nuk do të rimbursohet nga shteti ose sigurimi shëndetësor. Duke shpallur rihapjen, javën e kaluar, kryeministrja Magdalena Andersson tha se "pandemia nuk ka mbaruar, por ka hyrë në një fazë krejtësisht të re" dhe ndërsa shkalla e infeksionit është rritur, kjo nuk rëndon kapacitetet spitalore.