Subvencionimi i efiçiencës së energjisë, inverterët më të kërkuarit nga qytetarët

Ministria e Ekonomisë, që prej 6 tetorit të këtij viti, ka hapur aplikim për subvencionim të efiçiencës së energjisë, ku i bëhet thirrje qytetarëve që të aplikojnë për të përfituar katër lloje pajisjesh, pompa termike, inverterë, kaldaja me biomasë dhe stufa individuale me biomasë. Deri më tani kosovarët janë duke shfaqur më së tepërmi interesim për inverterët (kondicionerë efiçientë). Nga 5,992 qytetarë, 2,656 kanë aplikuar për inverterë, pajisje që ulin shpenzimin deri në 70 përqind dhe do të subvencionohen me 40 përqind të vlerës apo deri në 400 euro, thuhet në përgjigjet e Ministrisë së Ekonomisë dhënë për KlanKosova.tv. Pajisja e dytë më e kërkuar është pompa termike, të cilën e kanë kërkuar 1,313 aplikues. Pompat termike, të cilat ulin shpenzimin e energjisë elektrike deri në 70 përqind, do të subvencionohen me 30 përqind të vlerës, deri në 2,500 euro. Ndërkohë, për stufa individuale me biomasë (dru), të cilat për familjet që janë pjesë e skemës së asistencës sociale do të subvencionohen me 90 përqind ose deri në 560 euro; ndërsa për të tjerët deri në 70 përqind, deri në 435 euro, kanë shafqur interesim 1,207 qytetarë. Më së paku e kërkuar nga pajisjet për subvencionim është kaldaja me biomasë (dru, pelet, briket), për të cilën kanë aplikuar vetëm 816 qytetarë. Kaldajat me biomasë do të subvencionohen me 70 përqind të vlerës, deri në 1,200 euro. Ministria ka vendosur të zgjasë afatin për aplikim në fazën e dytë deri më 7 nëntor, duke u bazuar në kërkesat e aplikantëve, të cilët kanë aplikuar në fazën e parë, por që në mungesë të kapaciteteve të kompanive për montim të pajisjeve e kanë të pamundur që të kryejnë procedurat e parapara brenda afatit të paraparë për aplikim në Fazën 2.