Stuhia ‘tremb’ pushuesit në Velipojë e Shëngjin, trafik i rënduar në aksin Shkodër-Lezhë-Milot

Reshjet e dendura të shiut gjatë orëve të paradites dhe drekës kanë sjellë dhe largimin e pushuesve  nga plazhet e Velipojës dhe Shëngjinit. Për rrjedhojë, kjo situatë ka sjellë trafik të rënduar në akset kryesore dhe rrugët dytësore të qarkut Lezhë. Top Channel bën me dije se prej më shumë se dy orësh, qarkullimi në aksin Shkodër–Lezhë dhe Lezhë–Milot është ngadalësuar ndjeshëm për shkak të fluksit të automjeteve. Vështirësi të shumta janë hasur edhe në daljen nga Shëngjini, ku drejtuesit e mjeteve kanë mbetur të bllokuar në radhë të gjata. Situata ka rënduar edhe rrugët dytësore, të cilat nuk kanë përballuar dot volumin e shtuar të mjeteve. Për të lehtësuar lëvizjen, në akset kryesore dhe në kryqëzimet problematike janë vendosur punonjës të policisë rrugore. Edhe pse reshjet kanë pushuar, fluksi i lëvizjes së automjeteve vijon të mbetet i lartë.