Studimi: Vaksinat kundër COVID-19 nuk ndikojnë në ciklin menstrual tek gratë

Një nga studimet e para për të gjurmuar nëse vaksinimi kundër COVID-19 mund të ndikojë në periodat e grave gjeti një ndryshim të vogël dhe të përkohshëm. Hulumtimi i botuar të mërkurën gjurmoi gati 4 mijë gra amerikane gjatë gjashtë cikleve menstruale dhe mesatarisht menstruacionet e ardhshme pas një vaksine filluan rreth një ditë më vonë se zakonisht. Por nuk pati asnjë ndryshim në numrin e ditëve të gjakderdhjes menstruale pas vaksinimit kundër COVID-19. "Kjo është tepër qetësuese, është e rëndësishme t'u thuash grave se çfarë i presin," tha Dr. Alison Edelman nga Universiteti i Shëndetit dhe Shkencës në Oregon, i cili udhëhoqi hulumtimin, shkruan Apnews, transmeton Klankosova.tv. Ndryshimet e lehta nga muaji në muaj janë normale dhe stresi, dieta, madje edhe ushtrimet mund të nxisin ndryshime të përkohshme. Studiuesit gjurmuan gratë e vaksinuara për tre cikle para vaksinimit dhe tre cikle menjëherë pas vaksinimit, duke përfshirë muajt që morën një dozë dhe i krahasuan ato me gratë e pavaksinuara. Një nëngrup prej 358 grave që morën të dyja dozat e vaksinës gjatë ciklit menstrual panë një ndryshim pak më të madh në gjatësinë e ciklit të tyre të ardhshëm, mesatarisht dy ditë. Rreth 10% e tyre kishin një ndryshim prej tetë ditësh ose më shumë, por më pas u kthyen në kufijtë normalë, raportuan studiuesit në revistën Obstetrics & Gynecology.