Stërvitja e ushtarëve serbë në kufi, Kurti: Njësi që trajnuan Radoiçiqin për sulmin në Banjskë

Kryeministri Albin Kurti është deklaruar lidhur me stërvitjen e ushtarëve serbë në kufi me Kosovën, gjatë ditës së mërkurë. Para mediave, shefi i qeverisë këto ushtrime i quajti provokim ndaj vendit, transmeton Klankosova.tv. Teksa po merrte pjesë në përurimin e segmentit Vushtrri-Prishtinë, Kurti ndër të tjera veçoi se njësitë serbe që po kryenin aktiviteteve në kufi me Kosovën, sipas tij janë njësi që e kishin trajnuar Milan Radoiçiqin për sulmin në Banjskë. “Provokim i Serbisë. Bëhet fjalë për njësi që e ka trajnuar kryekriminelin Radoiçiq për sulmin në Banjskë të Zveçanit. Forcat tona janë të përgatitura, dhe kufiri ynë është i mbrojtur”, tha Kurti. Kujtojmë se stërvitjet e ushtarëve serbë në afërsi të fshatrave të Gjilanit për Klankosova.tv i ka konfirmuar edhe KFOR-i, i cili tha se janë aktivitete që nuk përbëjnë rrezik për sigurinë.