Spanjë: Banda shqiptare grabiste shtëpi e lokale, paratë i investonte në plantacionet e marihuanës

Policia spanjolle gjatë ditës së djeshme ka arrestuar anëtarët e një organizate kriminale me origjinë shqiptare. Ky grup dyshohet se grabiste apartamente dhe lokale. Oficerët e Mossos d’Esquadra, operacionin e zhvilluan në disa rajone të Katalunisë. Që nga ora gjashtë e mëngjesit, oficerët e policisë u vendosën në Barcelonë, Cunit, L’Espelt, Òdena dhe Montmaneu (Anoia) dhe gjithashtu në Tàrrega e Urgell, për të arrestuar të dyshuari. Mediat spanjolle raportojnë se dyshohet që anëtarët e grupit kriminal kanë grabitur rreth 20 apartamente dhe lokale. Hetimet lidhur me këtë rast kishin zgjatur disa muaj dhe ka qenë i ndërlikuar, pasi grabitësit me prejardhje shqiptare, kishin përdorur teknika të përsosura të grabitjeve duke marrë shumë masa mbrojtëse. Disa nga sendet e grabitura, autorët i kishin fshehur në një zonë pyjore, transmeton Klankosova.tv Operacioni, në të cilin kanë marrë pjesë ekipet e ndërhyrjes si ARRO dhe Brigada Mobile ka synuar arrestimin e disa personave, të gjithë anëtarë të bandës së hetuar. Në mesin e të arrestuarve që DIC i Mossos kërkon të nxjerrë para gjykatësit janë drejtuesit e komplotit, kriminelë të rrezikshëm të kombësisë shqiptare. Nga hetimet policore rezulton se grabitjet kryheshin për sigurimin e fondeve për ti financuar më pas në plantacionet e marihuanës. Gjatë operacionit policia ka gjetur edhe 220 bimë marihuanë në Montmaneu, ndërsa në L’Espelt u gjetën 50 kilogramë sytha marihuanë. Biznesi fitimprurës dhe në të njëjtën kohë i paligjshëm i marihuanës në Katalonjë kontrollohet kryesisht nga shqiptarë, të cilët e kanë kthyer vendin në kopshtin e Evropës, pika nga ku prodhohet dhe dërgohet droga në veri. Vetëm këtë fundjavë u mësua se dy gjermanë po blinin marihuanë nga trafikantët e drogës.