Sovranitetit e integriteti territorial i Kosovës, prioritet kombëtar, thotë ministri i jashtëm i Shqipërisë

Ministri për Europën dhe Punët e Jashtme, Igli Hasani i Shqipërisë, teksa ka bërë një rezyme të diplomacisë shqiptare përgjatë vitit 2024 që po lëmë pas, ka parashtruar edhe objektivat për vitin 2025. Në pritjen e fundvitit me gazetarët, Hasani tha se përgjatë vitit 2024, një moment historik ishte mbajtja e Konferencës së Dytë dhe të Tretë Ndërqeveritare me Bashkimin Evropian, më 15 tetor 2024, në Luksemburg, ku u hap kapitulli i parë për negociata. Sipas Hasanit, këta hapa shënuan një fazë të re në procesin e anëtarësimit dhe i dhanë një impuls gjithë procesit të integrimit. Hasani vuri në dukje se në vitin 2025, objektivi është që të hapen të gjithë kapitujt me Bashkimin Evropian. “Objektivi ynë është i qartë: në vitin 2025 synojmë të hapim të gjithë grup-kapitujt dhe të mbyllim grup-kapitullin e gjashtë, ndërsa deri në fund të vitit 2027, planifikojmë të mbyllim të gjitha negociatat dhe të jemi gati për anëtarësim në Bashkimin Evropian deri në vitin 2030. Ky është një qëllim ambicioz, dhe diplomacia do të luajë një rol kyç në realizimin e tij, me komunikim dhe bashkëpunim të ngushtë me shtetet anëtare të BE-së. Në këtë kuadër, pjesëmarrja e Shqipërisë në Procesin e Berlinit, i cili u mbajt këtë vit në Berlin në dhjetëvjetorin e tij, ka qenë gjithashtu një mundësi për të shpejtuar integrimin dhe intensifikuar mbështetje për stabilitetin në rajon dhe në Evropë”, u shpreh Hasani. Ministri i Jashtëm theksoi gjithashtu se marrëdhëniet me fqinjët dhe siguria rajonale janë në fokusin e diplomacisë shqiptare, ndërsa sovranitetit dhe integriteti territorial i Kosovës, sipas tij, janë prioritet kombëtar. “Shqipëria ka dhënë mbështetje të vazhdueshme për ruajtjen e stabilitetit dhe integritetit të Kosovës në një periudhë të ngarkuar me sfida të brendshme dhe të jashtme. Kemi mbështetur gjithmonë dialogun e lehtësuar ndërmjet Kosovës dhe Serbisë, i cili ka për qëllim normalizimin e marrëdhënieve dhe arritjen e një marrëveshjeje të qëndrueshme paqësore. Ky proces është i domosdoshëm për stabilitetin afatgjatë të rajonit dhe për integrimin e të dyja shteteve në strukturat evropiane. Shqipëria ka luajtur një rol konstruktiv në këtë dialog, duke inkurajuar palët për të shprehur fleksibilitet dhe angazhim të vërtetë për arritjen e një marrëveshjeje që do të respektojë të drejtat e të gjithë qytetarëve dhe do të sigurojë një paqe të qëndrueshme. Kemi ofruar, gjithashtu, mbështetje të vazhdueshme për Kosovën në këtë proces, duke lobuar për mundësitë që ky dialog të përfshijë përfitime të prekshme për të dyja vendet dhe për integrimin e Kosovës në bashkësinë ndërkombëtare”, theksoi Hasani. Ai shtoi se Shqipëria ka dënuar me forcë çdo formë të dhunës dhe terrorizmit të manifestuar në territorin e Kosovës, duke përfshirë këtu çdo akt të dhunshëm që ka synuar drejtpërsëdrejti destabilizimin e saj dhe më gjerë të Ballkanit Perëndimor. Hasani ka bërë të ditur gjithashtu, se ka nisur “bashkëpunimi konkret me NATO-n për organizimin e Samitit të Aleancës në Tiranë në vitin 2027, ku Shqipëria do të jetë vendi i parë që do të presë një ngjarje kaq të rëndësishme në rajon”. Kreu i diplomacisë shqiptare shpjegoi se mbetet prioritet forcimi i lidhjeve me diasporën, ndërsa vuri në dukje se Ministria e Jashtme po eksploron “mundësitë për të rinjtë shqiptarë që të kthehen në atdhe dhe të kontribuojnë në zhvillimin e vendit, duke krijuar mundësi për "brain gain" përmes kthimit të njohurive dhe eksperiencave nga jashtë”./rtsh.al/