Lajmet e fundit
Sot nga ora 12:00, para Gjykatës Themelore në Mitrovicë do të protestohet për rastin e Betina Ymerit e cila për shkak të kërcënimeve nga fejuari i saj kreu vetëvrasje.
Protesta organizohet për t'u bërë thirrje institucioneve përkatëse që rastin ta trajtojnë me prioritet dhe në mënyrë profesionale që fajtori ta merr dënimin e merituar.“Ky sistem e kjo mendësi të ndryshojë, që fëmijët tonë të ndihen të sigurt dhe jo të vetmuar. Të mos ndodhin më vetëvrasje dhe kërcënime tjera që çojnë në vetëvrasje, dhe të mos ndodhë edhe një humbje jete”, thuhet në njoftim.
Ndryshe, Betina Ymeri (19) dyshohet se i dha fund jetës së saj, për shkak të kërcënimeve serioze nga i fejuari i saj L.SH. (19), i cili është arrestuar nga policia.
Ndaj të dyshuarit është iniciuar rasti për dyshimin e kryerjes së veprës penale shtytja në vetëvrasje dhe ndihma në vetëvrasje, ndërsa me urdhër të prokurorit të dyshuarit i është caktuar masa e ndalimit policor prej 48 orësh.
Hetimet në lidhje me këtë rast do të vazhdojnë nga ana e hetuesve të NJHR-së në koordinim me prokurorin e shtetit.
Ndryshe nëna e të ndjerës, Fatime Ymeri, ka folur ekskluzivisht në Info Magazine në Klan Kosova, mbi shkaqet që sipas saj, mund të kenë shtyrë të bijën për ta kryer këtë akt.
Pjesën ku ka folur Ymeri mund ta ndiqni në videon më poshtë nga minuta e 35:00.
