Emisari i BE-së për dialogun Kosovë-Serbi, Peter Sorensen, ka zhvilluar të premten një takim me zyrtarin e lartë të Byrosë për Çështje Evropiane dhe Euroaziatike në Departamentin e Shtetit amerikan, Brendan Hanrahan.
Vetë Sorensen shkroi shkurtimisht në X për këtë takim, ku tha të jetë diskutuar për dialogun e arritjet e fundit, raporton Klankosova.tv.
Po ashtu, ai tha se është siguruar harmonizimi në hapat përpara të dialogut mes dy vendeve.
“Takim i shkëlqyer me Zyrtarin e Lartë të Byrosë, Brendan Hanrahan në Departamentin e Shtetit. Diskutuam për dialogun, shqyrtuam arritjet e fundit dhe siguruam harmonizimin në hapat përpara”, shkroi Sorensen në X.
Kujtojmë se pak ditë më parë, ndërmjetësi evropian i bisedimeve qëndroi në Kosovë, ku pas një takimi me kryeministrin Albin Kurti, tha se janë pajtuar për disa masa shtesë në zbatimin e Ligjit për të Huajt dhe atij për Automjete, përfshirë dhënien e lejes nga Qeveria e Kosovës për një periudhë fillestare prej 12 muajsh për punëtorët arsimorë e shëndetësorë dhe studentët serbë. /Klankosova.tv
https://klankosova.tv/sorensen-takim-me-hanrahan-ne-shba-pas-dakordimit-me-kurtin-per-serbet/
●●●
ASHKRIMI NGA
A
Editorial nga Klan Kosova — ndjek lajme dhe zhvillimet e tjera kryesore të vendit.
