Lajmet e fundit
Kandidati për deputet nga radhët e Lidhjes Demokratike të Kosovës, Vehbi Mujku, ka hedhur akuza të rënda ndaj Qeverisë Kurti, duke e akuzuar për keqmenaxhim të fondeve publike dhe për sulm të drejtpërdrejtë ndaj sektorit privat.
Sipas Mujkut, qeveria aktuale po e targeton sektorin privat, duke e dëmtuar atë në mënyrë të vazhdueshme.
Ai, në “Rubikon” të Klan Kosovës tha se bizneset private, të cilat janë ndërtuar me shumë sakrificë, kredi dhe punë të palodhshme, po sulmohen padrejtësisht, ndërkohë që qeveria po përpiqet t’u marrë punëtorët përmes, siç i quajti ai, “lëmoshave”.
“Çka po bën kjo qeveri. Është shumë interesant që po e sulmon në vazhdimësi sektorin privat, kopanit të cilat kanë ndërtuar me mund, sakrificë, kredi, dhe ka arrit ky me i përfitu punëtorët, duke ofruar lëmosha të tilla, dhe t’i sulmojë ata që kanë krijuar vende të punës. Target i kësaj qeverie, i Kurtit, është pikërisht sektori privat. Ai po rrezikon aktivitetin e tyre biznesor”, tha Mujku.
Ai ngriti shqetësime edhe për një kredi prej 47 milionë eurosh, të marrë para tri vjetësh, e cila sipas tij ishte e destinuar për reforma në skemat sociale dhe pensionale. Mujku tha se, pavarësisht zhurmës së madhe në Kuvend për këto reforma, deri më tani nuk ka asnjë rezultat konkret.
“Paratë janë shpenzuar në tërësi, projekti është drejt fundit, por nuk ka asnjë reformë, asnjë ligj të miratuar. Fëmijët tanë do ta paguajnë këtë kredi për 30 vjet”, u shpreh ai, transmeton Klankosova.tv.
Një tjetër anomali e përmendur nga Mujku lidhet me blerjen e pajisjeve për persona me aftësi të kufizuara. Sipas tij, vitin e kaluar qeveria ka ndarë rreth 7 milionë euro për këtë qëllim, por pajisjet ende nuk janë shpërndarë dhe ndodhen të bllokuara në QKUK.
Ai theksoi gjithashtu dyshime për abuzime me çmime, duke përmendur raste kur shkopinj për persona të verbër janë blerë për 98 euro, ndërkohë që çmimi i tyre në treg sillet nga 6 deri në 8 euro.
“Në anën tjetër e kemi edhe në anomali tjetër. Vitin e kaluar qeveria ka nxjerr një udhëzim administrativ për një përdorim për blerjen e disa pajisjeve për persona me aftësi të kufizuara. Vlera ka qenë rreth 7 milionë euro. Ato pajisje të cilat janë blerë vitin e kaluar ende janë të burgosura në QKUK, ende nuk janë shpërnda. Ka pasur shkopinj për persona të verbër që janë blerë për 98 euro e çmimi i tyre në treg është 6-7-8 euro”, u shpreh njohësi i çështjeve sociale.
