12:55 - Rizvanolli, LDK-së dhe PDK-së: Krejt kemi qenë kundër heqjes së bllok-tarifës, vetëm ju keni qenë për
Ministrja e Ekonomisë dhe Energjisë, Artane Rizvanolli, u është përgjigjur akuzave të opozitës lidhur me faturat e rrymës, duke thënë që kanë qenë Partia Demokratike e Kosovës dhe Lidhja Demokratike e Kosovës e kishin shtyrë përpara heqjen e bllok-tarifës më 2017.
“Disa prej gjërave janë aq të kota dhe shpifje sa që nuk ia vlen me u diskutu”, ka thënë Rizvanolli në Kuvendin e Kosovës.
“Të tjerat janë gati po aq të kota dhe shpifje, mirëpo mendoj që qytetari mundet me i besu nëse nuk e demantoj e po më duhet me folë. Me folë ju për fitimet e KEDS-it dhe KESCO-së ju që e keni privatizu një monopol natyror kundër mendimeve të krejt ekspertëve, kundër mendimeve të neve sot që jemi këtu, nuk keni të drejtë morale, thjesht”, ka vijuar ajo, njofton Klan Kosova.
“KEDS-it edhe KESCO-së i rritet marzha e fitimit kur i rritet shitja e energjisë elektrike. Këtu po ju kthej prapë në 2017-tën. A ju kujtohet 2017-ta që e përmena pak ma herët edhe heqjen e bllok-tarifës?”
“A e dini kush kanë qenë për heqjen e bllok-trafikës? KEDS-i, KESCO-ja, LDK-ja dhe PDK-ja”.
“AS ZRrE-ja, as shoqëria civile, as Lëvizja Vetëvendosje, madje as AAK-ja, Besnik Tahiri i së cilës më parë e shajke edhe bllok-tarifën përderisa në atë kohë e kanë kundërshtu heqjen e saj me shumë të drejtë”.
“Pra, KEDS-i dhe KESCO kanë kërku në atë kohë me u heqë bllok tarifa, ka qenë në në interesin e tyre sepse ata sa më shumë që shesin energji elektrike, aq më të madh e kanë fitimin duke qenë se janë kompani të rregulluara”.
Rizvanolli tha se për këtë punë ekzistojnë edhe transkriptuat e asaj kohe, dhe se janë pikërisht këto parti që dikur kishin qenë në pushtet fajtore pse ballafaqimi me krizën e energjisë për qeverinë aktuale ka qenë edhe më i vështirë.
“Këtë ua keni mundësu ju. Jo që ua keni mundësu por janë transkriptat, ka pasë ndërhyrje në komision parlamentar, e kanë detyru ZRre-në edhe në raport të tarifave të atij viti shkrun që mendimi i ZRrE-së ka qenë mos me u hekë bllok-tarifa, ju keni insistu mos me u heqë blllok-tarifa dhe për fat të keq ata ju kanë dëgju dhe e kanë heqë bllok-tarifën”.
“Dhe kjo ka qenë një prej arsyeve pse kemi pasur eksplodim të kërkesës dhe pse e kemi pasur përballjen me krizën shumë ma të vështirë se që e kemi pasë sikur të kishte qenë zhvillimi i konsumit normal qysh ka qenë t’u shku”.
“Logjika juj: S’e keni subvencionu qytetarin por KEDS-in dhe KESCO-n, a e dini çka do me thanë?”
12:34 - Krasniqi, Rizvanollit: 100 eurot që ua dhatë qytetarëve, ua morët pas dy ditësh me fatura të rrymës
Kryetari i Partisë Demokratike të Kosovës, Memli Krasniqi, ka thënë se Qeveria Kurti ua ka dhënë qytetarëve nga 100 euro dhe pas dy ditësh ua ka marrë përmes faturave të rrymës.
Kështu ka thënë ai nga foltorja e Kuvendit, ku po bëhet shqyrtimi i Propozim-rezolutës në lidhje me çmimin dhe faturimin aktual të energjisë elektrike për konsumatorët, raporton Klan Kosova.
“Faturat e muajit të kaluar e kanë tmerruar secilën familje. E këtu kemi zyrtarë të qeverisë që jetojnë në një tjetër realitet. A mund të na tregoni se sa janë rritur të hyrat dhe profiti e KEDS-it dhe KESCO-s në krahasim me qeverisjet e kaluara”, ka thënë Krasniqi.
“Ua keni dhënë nga 100 euro, pas dy ditësh ua keni marrë me fatura të energjisë”, ka shtuar ai.
Tutje, ai ka thënë se kushdo që është i përfshirë në shtrenjtimin e energjisë elektrike, do të japë përgjegjësi.
“Jam i bindur se ky është krim i organizuar, jam i bindur se shumica prej jush nuk jeni në dijeni. Kjo është skemë kriminale në krye me Martin Berishajn, e kjo nuk bëhet pa dijeninë e Kurtit. Kjo do të dalë në shesh dhe të gjithë do të japin përgjegjësi”, është shprehur Krasniqi.
12:04 - Tahiri: Qysh ka mundësi me e ble rrymën dy herë ma lirë e me të ardhë çmimi ma i lartë në histori?
Shefi i Grupit Parlamentar të Aleancës për Ardhmërinë e Kosovës, Besnik Tahiri, ka pyetur qeverinë se si është e mundur që faturat e rrymës të vijnë me çmime aq të larta kur një megavat vitin e kaluar në tregjet ndërkombëtare ka mundur të blihet dy herë më lirë.
“Si Kuvend kemi thirrë një seancë të jashtëzakonshme me një temë e një kërkesë që opozita e adreson te ky Kuvend, e që ndërlidhet me një përgjigje që ne duhet ta japim si Kuvend i Kosovës a mendojmë që çmimi i energjisë elektrike është I lirë apo I shtrenjtë”, ka thënë Tahiri në foltoren e Kuvendit, njofton Klan Kosova.
Ai po ashtu tha që si Kuvend duhet të rekomandojnë Zyrës së Rregullatorit të Energjisë uljen e çmimit të rrymës.
Si Kuvend i Kosovës a duhet që t’i rekomandojmë një Institucioni Kushtetues ZRrE-së, qeverisë, për uljen e çmimit të energjisë duke e ditur që ky çmim është çmimi më i lartë që paguan qytetari i Kosovës në historinë e vet e po ashtu duke e ditur që në tregjet ndërkombëtare çmimi i blerjes së një megavati është më i lirë dy herë më shumë se në vitin që shkoi”.
“Pyetja ime për ju deputetë është: Qysh ka mundësi? A ka najkush që e shpjegon në këtë qeveri se sa është i rëndësishëm ky debat, shihet edhe prezenca e qeverisë me një ministër. Po a ka dikush që e shpjegon se qysh ka mundësi me e ble një megavat këtë vit dy herë ma lirë se para dy vjetësh e çmimi me qenë ma i shtrenjtë? Mbi çfarë baze është ky çmim i energjisë elektrike për konsumatorë, për qytetarët e Kosovës kur dihet që ka një marrëveshje sa kushton, sa i jep KEK-u çmimin KEDS-it?
Qysh ka mundësi të nderum deputetë që njëri ndër premtimet kryesore me të cilat ju keni ardhë në këtë qeveri dhe në këtë pushtet ka qenë që ta zbrisni çmimin e energjisë elektrike, bile kryeministri thoshte, po e citoj, ‘ne paguajmë shumë shtrenjtë duke pasur parasysh që flemë mbi qymyr’. Këtë e ka thanë kryeministri i Kosovës.
12:02 - Rizvanolli: Kosova mbetet me çmimin më të lirë të rrymës në rajon
Ministrja e Ekonomisë, Artane Rizvanolli, ka thënë se Kosova mbetet shteti me çmimin e energjisë elektrike më të lirin në rajon.
Kështu ka thënë ajo nga foltorja e Kuvendit, ku po bëhet shqyrtimi i Propozim-rezolutës në lidhje me çmimin dhe faturimin aktual të energjisë elektrike për konsumatorët, raporton Klan Kosova.
“Vitet e fundit kanë qenë sfiduese në sektorin e energjisë, kriza u përballua në mënyrën më të mirë të mundshme”, ka thënë ministrja.
“Patëm një bashkëpunim të shkëlqyeshëm me Shqipërinë. Kosova mbetet shteti me çmimin e energjisë elektrike më të lirin në rajon”, ka shtuar ajo.
Tutje, Rizvanolli ka treguar se Qeveria e Kosovës i ka ndihmuar qytetarët dhe bizneset përmes subvencionimit.
11:53 - Kusari-Lila: Ka dyshime për fatura të pasakta, qytetarët t'i drejtohen KESCO-së dhe ZRrE-së
Shefja e Grupit Parlamentar të Lëvizjes Vetëvendosje, Mimoza Kusari-Lila, ka thënë që ekzistojnë dyshimet për faturim të pasaktë të energjisë elektrike, por që qytetarët duhet t’i drejtohen KESCO-së dhe Zyrës së Rregullatorit të Energjisë.
“Se ka dyshim për faturim jo të saktë është fakt evident, për të cilin qytetarët duhet t’i drejtohen furnizuesit KESCO dhe Zyrës së Rregullatorit të Energjisë”, ka thënë Kusari-Lila në Kuvendin e Kosovës, njofton Klan Kosova.
“Përderisa ne si ligjvënës kemi mundësinë të ftojmë menjëherë ZRrE-në për të raportuar mbi procesin e shqyrtimit të kërkesave të tyre dhe masave eventuale të ndërmarra ndaj furnitorit KESCO, gjithashtu duhet të jemi pjesëmarrës aktivë në shqyrtimin e rregullt tarifor”.
“Për informatën tuaj, furnitori i shërbimit universal do të paraqesë deri këtë të hënë më 22 janar të dhënat për kostot aktuale dhe propozimet për të hyrat për FShU-në, ndërsa më së largu deri më 5 shkurt 2024 ZRrE-ja duhet të njoftojë lidhur me vlerësimin e tyre për propozimet e marra”.
Sipas Kusari-Lilës, propozimet e opozitës tashmë janë afat i rregullt i çmimeve, dhe se masat e qeverisë e kanë vazhdimësinë nga viti 2022 e deri edhe sivjet.
Shqyrtimet dhe propozimet tuaja në rezolutë janë tashmë afat i rregullt i çmimeve dhe si proces është i filluar nga ZRrE-ja për vitin 2024-2025.
“Ndërsa, sa u përket masave të qeverisë, ato jo vetëm që kanë vazhdimësinë që nga viti 2022, por janë të përfshira edhe në buxhetin e miraturat nga ky Kuvend për vitin 2024”.
11:43 - Besian Mustafa: Gati secili projektligj që po e dërgojmë në Kushtetuese po rezulton antikushtetues
Deputeti nga Lidhja Demokratike e Kosovës, Besian Mustafa, ka thënë se gati secili projektligj që po e dërgojnë në Gjykatën Kushtetuese, po rezulton antikushtetues.
Kështu i ka thënë ai shefes së grupit parlamentar të Lëvizjes Vetëvendosje, Mimiza Kusarit, gjatë seancës së jashtëzakonshme ku po bëhet shqyrtimi i Propozim-rezolutës në lidhje me çmimin dhe faturimin aktual të energjisë elektrike për konsumatorët, raporton Klan Kosova.
“Gati secili ligj që po e dërgojmë, po rezulton antikushtetues. Problemi është te ju dhe jo te ne që po i dërgojmë projektligjet në Kushtetuese”, është shprehur Mustafa.
11:43 - Kusari-Lila: Rezoluta e opozitës për faturat e rrymës nuk është serioze
Shefja e Grupit Parlamentar të Lëvizjes Vetëvendosje, Mimoza Kusari-Lila ka thënë që seanca e sotme e jashtëzakonshme për faturat e energjisë elektrike e thirrur nga opozita ka mundur të jetë pjesë e seancave të rregullta pasi që nuk ka asgjë të re nga opozita, pos kopje të kërkesave të njëjta nga vitet e kaluara.
Përderisa tema që është kërkuar të trajtohet ose me një seancë të jashtëzakonshme është e rëndësishme për të gjithë qytetarët, e njëjta do të mund të trajtohej si pikë e rregullt e një seance të rregullt të Kuvendit ashtu siç do e donte rendi institucional”, ka thënë Kusari-Lila në foltoren e Kuvendit.
“Por sikur të ndodhte kjo, që në fillim, di të duhej të flisnim për zbatimin e marrëveshjeve për zbatimin e energjisë për katër komunat në veri të vendit, dhe heqjen përfundimtare të barrës financiare nga buxheti i shtetit në këmbim të ruajtjes së sovranitetit të sistemit elektroenergjetik të vendit tonë”.
“Kjo situatë e re është hera e parë që zbatohet pas gati një çerekshekulli në kuptimin e përmbushjes së obligimit qytetar për energjinë e shpenzuar nga banorët e katër komunave në veri të vendit”.
“Megjithatë pasi kemi vendosur për një alternativë tjetër dje as pasi kërkesa e sotme për seancë të jashtëzakonshme nuk përmban asnjë risi nga opozita por është saktësisht kopje dhe përsëritje e të njëjtave kërkesa nga vitet e kaluara kur situata e furnizimit me ne energji ishte shumë më dramatike, dhe përkundër të gjitha vështirësie kemi pasur qeverinë e Kosovës e cila përmes masave të shumta dhe afatgjate vazhdon tu qëndrojë afër qytetarëve të vendit”.
Kusari-Lila tha se rezoluta e prezantuar nga opozita nuk është fare serioze, dhe listoi masat që i ka ndërmarrë qeveria.
“Fillimisht rezoluta e prezantuar nuk është serioze dhe nuk kontribuon në ofrimin e zgjidhjes”.
“Kjo nuk është risi në vetvete pasi që zgjidhjet e vetme që i keni ofruar në vazhdimësi kanë qenë seanca të jashtëzakonshme për gjendjen në sektorin e energjisë, komisione hetimore për sektorin e energjisë në mesin e krizës, ndërkaq në vazhdimësi keni abstenuar në votime e mospjesëmarrje në zhvillimin e politikave për sektorin e energjisë përkundër se siç mund të pajtohemi, sifdat shumëvjeçare të këtij sektori janë përgjegjësi edhe e juaja nga tërë dekadat e fundit”.
“Përkundër abstenimit tuaj në këtë proces, pozita në Kuvend dhe qeveria e Kosovës kanë qenë seriozisht të angazhuara në gjetjen e zgjidhjes dhe ofrimin e lehtësirave për ballafaqimin me situatën e vështirë me energji elektrike”.
“ Ne si pozitë e kemi miratuar strategjinë për energjinë 2022-2031 e cila në përputhje me politikat tranzitore të sektorit parasheh rritjen e kapaciteteve të burimeve të ripërtërishme deri në një mijë e 300 megavatë”.
Ajo po ashtu tha se gjashtë herë i kanë vazhduar masat emergjente për sektorin e energjisë dhe kanë miratuar plotësimin e ndryshimit të ligjit për energjinë.
“Në funksionimin e zinxhirit politkëbërës për sektorin e energjisë kuvendi këtë rol ka, ndërsa në procesin e përcaktimit të çmimit dhe shqyrtimit tarifor atë siç e dimë të gjithë e bën Zyra e Rregullatorit të Enerjgusë pjesë e së cilit shqyrtim kanë mundësi të jenë të gjithë pa përjashtim”.
“Me arsyetimin e kërkesës së opozitës këtë seancë është parashtruar teoria se kthimi i bllok-tarifës është përcjellë me diskriminim të drejtpërdrejtë të qytetarëve të cilët ngrohen me energji elektrike”.
“E vërteta qëndron se pikërisht tërheqja e bllok-tarifës në vitin 2017 ka nxitur konsumin e energjisë elektrike për ngrohje në veçanti në periudhën e pikut”.
“Kështu që kemi përfundu në një periudhë të shkurtër kohore në ngritje të konsumit mbi 40 për qind dukuri e cila shumë pak ngjan në vendet tjera në zhvillim apo në vendet e zhvilluara e aq më pak do të duhet të ishte prezentë në vendin i cili në kapacitetet energjetike të bazuara në thëngjill i ka të vjetruara prej 40 deri në 60 vjet”.
11:33 - Tahiri i thotë Kusarit: Një komision ua ka dërguar zyrtarin e lartë në burg
Shefi i grupit parlamentar të PDK-së, Abelard Tahiri, i ka thënë shefes së grupit parlamentar të LV-së, Mimoza Kusarit se një komision i incizuar nga PDK-ja ua ka dërguar në burg një zyrtar të lartë të partisë në pushtet.
Kështu ka thënë ai nga foltorja e Kuvendit, ku po bëhet shqyrtimi i Propozim-rezolutës në lidhje me çmimin dhe faturimin aktual të energjisë elektrike për konsumatorët, raporton Klan Kosova.
“Një komision ua ka dërguar një zyrtar të lartë në burg, edhe ky i dyti do ta çojë dikë në burg”, ka thënë deputeti Tahiri.
Tahiri ka thënë kështu duke iu referuar kryeshefit të KEK-ut, Nagip Krasniqit, i cili muaj më parë është arrestuar dhe mbajtur në paraburgim.
Propozim-rezoluta e PDK-së për uljen e çmimit të rrymës dhe heqjen e bllok-tarifave
Kuvendi i Kosovës është duke zhvilluar një seancë të jashtëzakonshme ku është duke u bërë shqyrtimi Propozim-rezolutës në lidhje me çmimin dhe faturimin aktual të energjisë elektrike për konsumatorët.
Me propozimin e Grupit Parlamentar të Partisë Demokratike të Kosovës dhe me mbështetjen e deputetëve tjerë opozitarë, deputeti Ferat Shala ka propozuar Rezolutën për uljen e çmimit të energjisë elektrike dhe heqjen e bllok tarifave.
Shala ka kërkuar që të miratohet kjo rezolutë, e cila përmban pesë pika:
- I rekomandon Zyrës së Rregullatorit për Energji (ZRRE), që brenda afatit të arsyeshëm kohor të anuloj vendimin për shtrenjtimin e çmimit të energjisë elektrike dhe të marrë vendim për uljen e çmimit të saj në harmoni me rrethanat socio-ekonomike dhe nivelin e çmimit të energjisë në tregun ndërkombëtar, respektivisht në bursat respektive ndërkombëtare;
- I rekomandon Zyrës së Rregullatorit për Energji (ZRRE), brenda afatit të arsyeshëm kohor të marrë vendim për anulimin - heqjen e bllok tarifës për kalkulimin e shpenzimeve të energjisë elektrike për konsumatorët familjarë;
- I rekomandon Zyrës së Rregullatorit për Energji (ZRRE) ndërmarrjen e masave në raport me Kompaninë Kosovare për Furnizim me Energji Elektrike (KESCO), për të siguruar trajtimin efektiv dhe të barabartë të konsumatorëve që kanë parashtruar ankesa ndaj faturave të energjisë elektrike për muajin dhjetor 2023 dhe ankesave eventuale të konsumatorëve në vitin 2024.
- Obligon Qeverinë e Republikës së Kosovës për marrjen e masave, veprimeve e vendimeve për krijimin e parakushteve financiare për anulimin e menjëhershëm të vendimit për shtrenjtimin e energjisë elektrike dhe lehtësimin e barrës financiare për konsumatorët familjarë të energjisë elektrike;
- Kërkon nga Zyra për Rregullatorin e Energjisë dhe Qeveria e Republikës së Kosovës, që në afat sa më të shkurtër kohor të njoftoj Kuvendin për përmbushjen e pikave 1, 2, 3 dhe 4 të kësaj rezolute.
11:22 - Ferat Shala: Është zëvendësuar rryma e lirë e KEK-ut me atë shtrenjtë të importuar
Deputeti nga Partia Demokratike e Kosovës, Ferat Shala, ka thënë se energjia elektrike e lirë e KEK-ut është zëvendësuar me energjinë e shtrenjtë të importuar.
Kështu ka thënë ai gjatë shqyrtimit të propozim-rezolutës në seancën e jashtëzakonshme të Kuvendit në lidhje me çmimin dhe faturimin aktual të energjisë elektrike për konsumatorët, raporton Klan Kosova.
“Arsyeja e kësaj rritjeje të çmimit qëndron te fakti i çuditshëm menaxherial. Kemi zëvendësuar energjinë e lirë të KEK-ut, me energjinë e shtrenjtë të importuar”, ka thënë Shala.
“Kush ka përfituar nga ndërprerja e energjisë dhe si kanë përfituar, është çështje që duhet të hetohet”, ka shtuar ai.
“KEDS ka importuar rrymë me kosto prej 18 milionë eurosh dhe kjo rritje e çmimit është e papërballueshme për qytetarët”, ka shtuar ai.
Me propozimin e Grupit Parlamentar të Partisë Demokratike të Kosovës dhe me mbështetjen e deputetëve tjerë opozitarë, deputeti Ferat Shala ka propozuar Rezolutën për uljen e çmimit të energjisë elektrike dhe heqjen e bllok tarifave.
