Shtyhet gjykimi ndaj të akuzuarit për krime të luftës në Kosovë, Millorad Gjokoviq

Me kërkesë të mbrojtësit të të akuzuarit Millorad Gjokoviq, avokatit Vasilije Arsiq, është shtyrë seanca e së enjtes në Gjykatën Themelore në Prishtinë, në rastin ku Gjokoviq po akuzohet për krime lufte. Avokati Arsiq kërkoi që seanca të shtyhet me arsyetimin se nuk i kanë në posedim disa shkresa të lëndës të përkthyera. Ai kërkoi nga trupi gjykues që të aprovohet kërkesa e tij për përkthimin e shkresave të kërkuara; procesverbali i dëshmisë së dëshmitarit Ferat Morina, procesverbali i dëshmisë së dëshmitarit Halit Gashi dhe deklarata e dhënë në Stacionin Policor në Vitomiricë dhe përkthimi i ditarit- pjesën e ngjarjes së fshatit Ozdrim, shkruan Betimi për Drejtësi. Këtë kërkesë, kryetari i trupit gjykues Valon Kurtaj e aprovoi. Në këto rrethana, seanca e sotme u ndërpre. Sipas aktakuzës së përpiluar më 23 qershor 2023, Millorad Gjokoviq akuzohet se në vitet 1998-1999, në fshatin Ozdrim- Komuna e Pejës dhe në fshatrat përreth regjionit të Pejës, si pjesëtar i forcave policore dhe ushtarake serbe, ka aplikuar masat e vrasjes, bastisjes, rrahjes, maltretimit, arrestimit, torturës, trajtimit në mënyre mizore dhe çnjerëzore, mbajtjes në kushte skllavërie, dëbimit dhe deportimit të dhjetëra civilëve shqiptarë. Akuzohet edhe për plaçkitje, djegie dhe shkatërrimin e shtëpive të popullsisë civile të nacionalitetit shqiptar. Në aktakuzë thuhet se nga ana veriore e fshatit Ozdrim me rrugën regjionale Pejë – Mitrovicë, kishin hyrë ushtria e rregullt dhe në fund nga ana perëndimore e fshatit Ozdrim e cila kufizohet me fshatin Vitormiricë kishin hyrë grupet paramilitare të përzier edhe me pjesëtarë të njësiteve speciale ushtarake, filluan të shtinin me armë në drejtim të popullsisë civile me ç‘rast u vranë gjashtë civilë të nacionalitetit shqiptarë: I.K Sh.K, E.M, R.Sh, Z.Sh dhe M.H, ndërsa tre civilë të cilët u plagosen nga këto të shtëna: A.G, H.G dhe M.G, fillimisht u transportuan për në spitalin e Pejës e më pastaj u ekzekutuan dhe u varrosën në fshatin Lutogllavë, si dhe pesë civil të nacionalitetit shqiptarë: R.K, Z.K, A.K, A.K, A.Sh u vranë gjatë ofensivës, por asnjëherë nuk u gjetën trupat e tyre prandaj ende figurojnë si të zhdukur. Me këtë, Gjokoviq ngarkohet se në bashkëkryerje ka kryer veprën penale “Krim i luftës kundër popullsisë civile”, e sanksionuar me nenin 142 lidhur me nenin 22 të Ligjit Penal të ish-Republikës Socialiste Federative të Jugosllavisë ( tutje “LP i RSFJ-së”) si ligji në fuqi në kohën e kryerjes së veprës penale.