Shtëpia që u shit me autorizimin e një të vdekuri: Dyshime për falsifikim (VIDEO)

Shtëpia e Selatin Mehmetit, sipas dokumenteve të siguruara nga emisioni MAT në Klan Kosova, është shitur mbi bazën e një autorizimi të datës 16 prill 2002, ndonëse pronari i vërtetë kishte vdekur më 28 tetor 1989. Familja dyshon se dokumenti është falsifikuar. “Informatat i kemi marrë prej hallës, sikur që i ka tregu edhe vetë, në atë kohë, ne nuk e kemi pas mundësinë me ardhë në Kosovë, me e ndjekë këtë proces, por atëherë kemi marrë vesh që njëherë e kanë uzurpu shtëpinë, më vonë e kanë falsifiku autorizimin, edhe me qatë autorizimin e falsifikum e kanë shitë shtëpinë. Ata njerëzit që e kanë zurpu menjëherë mas luftës”, thotë Erdoan Mehmeti. Ai shton se personi që figuron në kontratë si Selatin Mehmeti nuk mund të ishte gjallë në atë kohë. “Personi që e ka bë shitblerjen me atë pronarin e ri, thirret Selatin Mehmeti, e pasi që ka vdekë babgjyshi im Selatin Mehmeit, 1989-tën s’ka mujt ai me bë kurrfarë kontrate, pra nuk është e mundshme. Ai ka vdekë 13 vjet më përpara këtij rasti”, shton Erdoani. Në autorizim pretendohet se Selatin Mehmeti i jepte Agim Mehmetit të drejtën për të kryer të gjitha veprimet juridike lidhur me shitblerjen e pronës në rrugën “Dalmatinska” në Prishtinë. Por, mënyra se si u bë ky nënshkrim ende mbetet e paqartë. Dokumenti ishte vërtetuar më pas në Gjykatën Themelore në Mitrovicë. Emisioni MAT kërkoi qasje në dokumentet mbi të cilat ishte bërë ky vërtetim, por gjykata e refuzoi kërkesën. “Pas shqyrtimit të kërkesës, është konstatuar se kërkesa nuk mund të aprovohet për shkak të kufizimeve të përcaktuara shprehimisht me ligj. Në rastin konkret, dokumentet e kërkuara janë pjesë e një dosjeje gjyqësore e cila aktualisht është arkivuar. Megjithatë fakti i arkivimit të dosjes nuk e ndryshon natyrën juridike të dokumenteve që ajo përmban, e as nuk e krijon automatikisht të drejtën të pakufizuar për qasje publike në to”, është përgjigjur zyra për medie në Gjykatën Themelore në Mitrovicë, për emisionin Mat në Klan Kosova. Videon e plotë të kësaj pjese e gjeni më poshtë:  https://youtu.be/ZO3jjLPtGAs https://youtu.be/4QMsD-XJig4