Shtëpia e Enver Hadrit në të cilën ka banuar edhe Faik Konica nuk është në shitje (FOTO)

Ish veprimtari i çështjes kombëtare, Enver Hadri, kishte pasur fatin që të banonte në shtëpinë e njëjtë në të cilën kishte jetuar edhe shkrimtari i madh shqiptar, Faik Konica. Së fundmi është thënë se kjo shtëpi që ndodhet në Bruksel është në shitje, por këtë e ka mohuar motra e Enver Hadrit, Nediha Hadri-Grapci dhe ish bashkëpunëtori i tij, Reshat Sahitaj. “Vëllai e ka të blerë shtëpinë. Ata të Faik Konicës ju kanë afruar vajzës, ku po arsyetohen se “Konica ka banuar këtu”, por ajo po thotë se “edhe unë kam kujtime këtu më babanë tim””, ka thënë Hadri-Grapci, njofton Klan Kosova. “Shtëpia s’ka dalë në shitje dhe s’ka për të dalë kurrë, sepse aty ka qëndruar edhe Faik Konica. S’ka shanse të shitet sa të jemi ne gjallë. Ta bëjnë muze është krejt tjetër dhe kjo mund të ndodhë me lejen e familjes”, është shprehur Sahitaj në Zona B. “Tash për tash nuk është shitje. Shtëpia ndodhet në “Rrugën e Shqipërisë”. Enveri ka prit tre vjet që të shitej një shtëpi dhe ta blinte dhe rastësisht ka qëlluar. Ai nuk e ka ditur se aty ka qëndruar edhe Konica. Ka qenë fat i Enverit që ka blerë shtëpinë ku ka banuar Faik Konica”.