Shqipëria magjeps botën, 6.6 milionë turistë e vizituan deri në korrik

Janë gati 6.6 milionë turistë që vizituan Shqipërinë deri në korrik. Numri i të huajve që kryesisht shkuan për pushime është zgjeruar me 4 për qind, krahasuar me janar-korrikun e vitit të shkuar, transmeton klankosova.tv. Pjesa më e madhe e tyre, mbi 6.2 milionë janë turistë nga vendet Europiane, ndjekur nga ata nga Shtetet e Bashkuara të Amerikës, Azia Lindore dhe Afrika. ''Këtë verë kemi pasur një rritje të ndjeshme të turistëve nga vende të ndryshme të Evropës dhe madje edhe nga Kanadaja. Krahasuar me një vit më parë, numri i prenotimeve është rritur ndjeshëm dhe sezoni po zgjatet më shumë. Turistët vlerësojnë mikpritjen shqiptare, çmimet e arsyeshme dhe bukurinë natyrore që ofron vendi ynë'', thotë për A2 CNN, Albulen Ndrepepaj, menaxher resorti. Venla, Henli dhe Antti, janë një grup të rinjsh nga Finlanda që bëjnë pushimet në Shqipëri. ''Është hera e parë që vij në Shqipëri dhe jam shumë e befasuar. Plazhet janë shumë të bukura, ushqimi i shkëlqyer dhe njerëzit tepër miqësorë'', thotë Venla. https://www.youtube.com/watch?v=sVPxQBApBnY ''Kam udhëtuar në disa vende të Ballkanit, por këtu ndjehem më lirshëm. Çmimet janë të mira dhe natyra është shumë e pastër'', thotë edhe Henli. ''Unë jam i apasionuar pas historisë dhe vizitova disa vende arkeologjike. Shqipëria ka shumë kulturë dhe potencial për turizëm, do t’ia rekomandoja miqve të mi'', thotë Antti. Megjithatë ritmet e zgjerimit të turizmit nuk po janë më ato të njëjta me vitet e shkuara. Muajin e kaluar në Shqipëri shkuan rreth 1.8 milionë të huaj, 0.4 për qind më tepër se korrikun e një viti më parë.