Shqipëria do të prodhojë armë dhe municione - rikthehet industria ushtarake

Shqipëria do të prodhojë armë dhe municione. Një projektligj i Ministrisë së Mbrojtjes i hap rrugë iniciativës përmes ngritjes së një shoqërie shtetërore, e cila do të kontrollojë këtë sektor. Thirrjen e parë për ngritjen e kësaj infrastrukture në Shqipëri, e bëri presidenti ukrainas Volodymyr Zelensky, në shkurt të këtij viti gjatë vizitës së tij në Tiranë, ndërsa qeveria shqiptare nuk e kundërshtoi. Propozimi për rikthimin e industrisë ushtarake, argumentohet me nevojat gjeopolitike të kohës, ku furnizimi me armë është bërë i domosdoshëm për NATO-n dhe vendet që ajo mbështet në pozicione lufte. Përveç kësaj, angazhimi në fuqizimin e një industrie të tillë, mund të konsiderohet edhe si një aktivitet fitimprurës për ekonominë e vendit, shkruan Euronews.al, përcjell Klankosova.tv. Shoqëria shtetërore që do të ngrihet, pritet të rikthejë në funksion uzinat e dikurshme, dhe të integrojë teknologji të reja në armatime. Ky nuk do të jetë investimi i vetëm në fushën e mbrojtjes, pasi një plan afatgjatë 10-vjeçar synon mobilizime të shtuara në ushtri dhe ngritjen e disa bazave ushtarake.