Shpërthen kanalizimi në shkollën "Ismail Qemali" në Prishtinë, ankohet prindi (VIDEO)

Në shkollën “Ismail Qemali” në Prishtinë, në ditën e dytë të nisjes së vitit të ri shkollor, kanë shpërthyer gypat e kanalizimit. Si pasojë e kësaj, nxënësit e ndërrimit të paradites, nuk kanë mbajtur mësim. Kështu tha për Klankosova.tv, nëna e një nxënësi të klasës së 5-të në shkollën “Ismail Qemali”. Ajo, në prononcimin për redaksinë, tha se u lajmërua pas orës 09:00 të mëngjesit, për të shkuar dhe marrë fëmijën e saj. “Nxënësit e paraleleve të 5-ta mbajnë mësimin në bodrum, ku edhe dritaret janë të rrethuara me hekura, për shkak të rrezikut për të hyrë ndonjë hajn. Kur ndodhin këto probleme, është vështirë që nxënësit të largohen nëse duhet të ikin shpejtë”, thotë ajo. Ajo shprehu shqetësim po ashtu për rrjedhën e kanalizimit, e cila kalon shumë afër dollapit ku ka tension të lartë të rrymës. Ndër të tjera, kjo nënë ankohet edhe për higjienën në shkollë, ku sipas saj pastërtia është tejet evidente. Për të gjitha këto ankesa, e njëjta thotë se kanë kërkuar përgjigje nga Komuna e Prishtinës, por të njëjtat nuk i kanë marrë kurrë. Rreth kësaj çështjeje, Klankosova.tv ka dërguar pyetje në adresë të Drejtorisë së Arsimit në kryeqytet dhe është në pritje të përgjigjes.