Shpërthejnë protestat e ashpra në Bangladesh pasi një tetëvjeçare u përdhunua dhe vdiq

Një tetëvjeçare, e cila u përdhunua në Bangladesh, vdiq nga plagët e marra të enjten, duke shkaktuar protesta të ashpra në mbarë vendin. Vajza u përdhunua teksa vizitonte shtëpinë e motrës së saj më të madhe në qytetin Magura diku midis natës së 5 marsit dhe mëngjesit të nesërm, sipas një rasti të paraqitur nga nëna e saj, shkruan BBC, transmeton Klankosova.tv. Burri 18-vjeçar i motrës së madhe, së bashku me prindërit dhe vëllanë e tij, u arrestuan dhe u dërguan në paraburgim. Mbrëmjen e së enjtes, pasi morën vesh lajmin për vdekjen e fëmijës, një turmë e zemëruar ka zbritur në shtëpinë ku dyshohet se ka ndodhur ngjarja, dhe ia kanë vënë flakën. Vajza vdiq rreth orës 13:00 me orën lokale të enjten pasi pësoi tre arreste kardiake, sipas një deklarate nga departamenti i qeverisë për Marrëdhëniet me Publikun (ISPR). “Edhe pse mjekët arritën ta stabilizonin gjendjen dy herë, zemra nuk arriti të rifillojë pas episodit të tretë”, thuhet në deklaratë. Ajo kishte kaluar gjashtë ditë në një gjendje kritike në Spitalin Ushtarak të Kombinuar në kryeqytetin Dhaka, pasi u shtrua në 8 mars. “Mendova se vajza ime do të mbijetonte”, tha nëna e saj pas vdekjes së vajzës, sipas mediave lokale. "Nëse ajo do t'ia kishte dalë, nuk do ta lija më kurrë të shkonte askund vetëm". Trupi i vajzës u dërgua përsëri në Magura me një helikopter të ushtrisë, i cili u ul në stadiumin lokal rreth orës 18:00 në mesin e protestave të ashpra. Aiyub Ali, oficer përgjegjës i stacionit policor Magura Sadar, tha se autoritetet luftuan për ta vënë situatën nën kontroll, sipas gazetës lokale të lajmeve The Daily Star. Mijëra njerëz u mblodhën në sheshin publik në Magura për namazin e kufomës së vajzës, lutjen islamike të xhenazes, para se ajo të varrosej në orën 19:30.